Londonda Kaspıı qubyr konsortsıýmy arqyly qazaqstandyq munaı tasymaldaý máselesi talqylandy

ASTANA. QazAqparat – «QazMunaıGaz» UK AQ (QMG) Basqarma tóraǵasy Maǵzum Myrzaǵalıev Londonda Ulybrıtanııanyń Syrtqy ister jáne halyqaralyq damý mınıstrliginiń Sanktsııalar jónindegi basqarmasynyń dırektory Devıd Rıdpen kelissóz júrgizdi, dep habarlaıdy QazAqparat kompanııanyń baspasóz qyzmetine silteme jasap.

Kezdesý barysynda Kaspıı qubyr konsortsıýmy munaı qubyry arqyly Qazaqstannyń energııa kózderin jetkizý máselesi de talqylandy.

QMG basshysy Ulybrıtanııanyń syrtqy saıası vedomstvosyna yntymaqtastyq pen turaqty keńesi úshin alǵys bildirdi.

«Álemdegi geosaıası ahýal kúrdelengen kezde sanktsııaǵa baılanysty táýekelder Qazaqstan munaıyn, ásirese KQK qubyry arqyly úzdiksiz jetkizýge «kedergi bolmaýy» asa mańyzdy. Bul eki tarapqa da ortaq múdde bolǵandyqtan, osy sekildi kezdesýdi syndarly túrde ótkizýimiz de mańyzdy», – dep atap ótti M.Myrzaǵalıev.

QMG Basqarma tóraǵasy QR Syrtqy ister mınıstrligi men Qazaqstannyń Elshiliginiń ulybrıtanııalyq seriktestermen turaqty baılanys ustaýdaǵy erekshe rólin atap ótti.