Londonda ınvestorlar tájirıbe bólisti
LONDON. KAZINFORM — Qazaqstan ekonomıkasyna qarjy quıyp jatqan 100-ge jýyq ınvestor Londonda bas qosty. Olar jergilikti iri bıznes ókilderine elimizdiń ınvestıtsııalyq ahýaly týraly egjeı-tegjeıli baıandap berip, tájirıbe bólisti, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.
Elimizde sheteldik ınvestorlarǵa qolaıly jaǵdaılardyń neshe túri jasalǵan. Máselen, olar aǵylshyn quqyǵy negizinde daýlardy sheshetin «Astana» halyqaralyq qarjy ortalyǵyna senim arta alady. 82 eldiń bıznes ókiline shekaradan ótý úshin vızanyń qajeti joq.
Paneldik sessııa kezinde tájirıbeli ınvestorlar kórgen-bilgenderimen bólisip, oılaryn ortaǵa saldy.
«Qazaqstanǵa kelińizder dep úgittep jatyrmyz. Biz taý-ken salasynda 8 jyldaı jumys istep, úkimettiń jasaǵan qamqorlyǵyna rıza boldyq. Brıtanııalyq kompanııalardyń qatarymyzǵa qosylǵanyn qalaımyz», — deıdi Knight Piésold UK kompanııasynyń dırektory Rıchard Elmer.
Geosaıası jaǵdaı alaı-dúleı bolyp turǵan zamanda alpaýyt elderdiń ózderi qıyn kezeńderdi bastan keshýde. Deıturǵanymen Qazaqstan prezıdenti 2029 jylǵa deıin ekonomıkamyzdy eki esege kóterý mindetin qoıyp otyr. Búgingi jıyn kezinde kedendik bajdardan bosatý, túrli salyqtyq jeńildikter jáne zattaı granttar týraly estigen áleýetti bıznesmender elge kelemiz dep nıet bildirdi.
«Biz bilim salasynda jumys isteımiz. Trenıngter ótkizip, oqý josparlaryn qurýǵa kómektesemiz. Brıtanııalyq oqý oryndarymen jáne qarjy ınstıtýttarymen tyǵyz baılanystamyz. Bizge Qazaqstan naryǵy óte qyzyqty bolyp tur», — deıdi TVET UK kompanııasynyń atqarýshy dırektory Mettıý Anderson.
Sharany Qazaq-Brıtan qaýymdastyǵy Qazaqstannyń Ulybrıtanııadaǵy elshiliginiń qoldaýymen uıymdastyrdy. 20 jyldan astam tarıhy bar qaýymdastyq eki el arasyndaǵy saýda-ekonomıkalyq, ınvestıtsııalyq, sondaı-aq bilim jáne mádenı baılanystardy nyǵaıtyp keledi.
«Búgingi taqyrybymyzdyń aýqymy keń boldy. Munaı-gaz, taý-ken, aýylsharýashylyǵy, zań qyzmeti jáne basqa da sala ókilderiniń basyn biriktirip, yntamaqtastyqtyń ózekti máselelerin talqyladyq», — deıdi Qazaq-Brıtan qaýymdastyǵynyń dırektory Djon Morroý.
Ulybrıtanııa — elimizdiń Eýropa kontınentindegi belsendi saýda-ekonomıkalyq seriktesteriniń biri. Eń iri 6 ınvestordyń qataryna kiredi.
Ótken jyldyń 3-shi toqsanynyń qorytyndysy boıynsha, memleketimizge 564 mln AQSh dollary kóleminde qarajat ákelgen. Bul aldyńǵy jyldyń dál sol kezeńimen salystyrǵanda shamamen 7 paıyzǵa artyq.
