Londonda fýtboldan Olımpıada chempıony B.Artaev atynda týrnır ótti
ASTANA. QazAqparat - Olımpıada chempıony Baqtııar Artaev kýbogyna arnalǵan stýdentter arasyndaǵy fýtbol týrnıri taıaýda Londonda ótti, dep habarlady www.24.kz.
Bul - osymen ekinshi márte ótip otyrǵan shara. Bul týrnırge ábden jattyqqan 16 komanda keldi. Tartysty oıyn kórsetip, jankúıerler kóńilinen shyǵa bildi. Jasyl alańdaǵy eń úzdik oıyn Brıstol men Londonnyń ýnıversıtettik kolledj komandalary arasynda ótti. Saıystyń sońǵy sátterinde 2:0 esebimen jeńilip jatqan londondyqtar qarsylastarynan jeńisti julyp alyp, 3:2 esebimen jartylaı fınalǵa joldama aldy. Qatarynan 3 gol soǵyp, komandaǵa jeńis syılaǵan shabýylshy Nazar Óteǵulovtyń eńbegin erekshe atap ótken jón. Ol tóreshiler tarapynan da joǵary baǵalanyp, «Týrnırdiń úzdik oıynshysy» ataǵyna ıe boldy. Týrnırdiń ótýine muryndyq bolǵan Ulybrıtanııadaǵy Qazaqstan elshiligi men «Bolashaq» halyqaralyq baǵdarlamalar ortalyǵy edi. Álbette shara ıesi - chempıon Baqtııar Artaev ta komandalardy qoldaı kelipti. Sportshy mundaı jarystar salaýatty ómir saltyn nasıhattap qana qoımaı, elden shalǵaı júrgen qazaqstandyq jastardyń aýyzbirshiligin bekem etetinin aıtady. Elimiz úshin tarıhı sáttiń qarsańynda munyń asa mańyzdy ekendigin alǵa tartady oıynshylar. Manchester komandasy esh kúmánsiz týrnır jeńimpazy atandy. Fınalda USL-di 3:0 esebimen tize búktirgen olar Artaev kýbogyn ıelendi. Janyp turǵan jiger men qajyrly eńbek sózsiz óz nátıjesin berdi. Sebebi, dál osy Manchester komandasynyń ókilderi sııaqty birde-bir sportshy óz isine berile qoımaǵan shyǵar, sirá. Úshinshi oryn «Aıran» komandasyna buıyrdy. Ol negizinen Brıtanııada jumys isteýge qalǵan ýnıversıtet túlekterinen jasaqtalǵan komanda edi. Al týrnır ıeleri - Brýnel ýnıversıtetiniń shákirtteri 4-orynǵa taban tirese de, qarsylastaryna barynsha qonaqjaılyq tanytty.
