Londonda evreı qaıyrymdylyq uıymyna tıesili 4 jedel járdem kóligin órtep ketti
ASTANA. KAZINFORM - Londonnyń soltústiginde evreı qaıyrymdylyq uıymyna tıesili tórt jedel járdem kóligi órtelgennen keıin eki adam ustaldy, dep habarlaıdy BBC.
Ustalǵandarǵa adam ómirine qaýip tóndirý .shin órt qoıdy degen kúdik eltirilip otyr.
«Hatsala» jedel járdem qyzmetiniń kólikteri evreı qaýymy tyǵyz qonystanǵan Golders-Grın aýdanynda dúısenbige qaraǵan túni órtelgen. Bul oqıǵa antısemıtızm negizindegi óshpendilik qylmysy retinde tergelip jatyr.
Sársenbi kúni tańerteń London polıtsııasy qalanyń soltústik-batysynda 47 jastaǵy er adamdy, al ortalyq bóliginde 45 jastaǵy taǵy bir kúdiktini ustady. Ekeýiniń de Ulybrıtanııa azamattary ekeni habarlandy.
Aýdandyq polıtsııa basshysy, bas sýperıntendant Djeıson Stıýart Bı-bı-sı arnasyna bergen suhbatynda bul ustaýlardy tergeýde barysyndaǵy mańyzdy qadam dep baǵalady. Sonymen birge ol polıtsııada taǵy bir er adamnyń beınesi túsken beınejazbalar bar ekenin aıtty.
— Evreı qaýymynyń qaýipsizdigine erekshe mán beremiz. Osyǵan baılanysty biz osy aptada qaýipsizdik sharalaryn kúsheıttik jáne ony aldaǵy aptalarda — Pesah merekesi kezinde jáne odan keıin de jalǵastyramyz. Qaýipsizdikti qamtamasyz etý úshin bar kúshimizdi salamyz, — dedi ol.
Mıtropolıt polıtsııasynyń terrorızmmen kúres bóliminiń basshysy Helen Flenagan tártip saqshylarynyń qolynda «keminde úsh adamnyń qatysy bar ekenin kórsetetin» beınejazbalar bar ekenin málimdedi.
— Jergilikti turǵyndardyń alańdaýly ekenin tolyq túsinemiz. Tergeý qarqyndy júrip jatyr. Biz bul iske qatysy bolýy múmkin barlyq tulǵalardy anyqtap, olardy ustaý jumystaryn jalǵastyramyz, — dep qosty ol.
Osyǵan deıin Ulybrıtanııada evreılerge shabýyl jasamaq bolǵan eki er adam ómir boıyna sottalǵany týraly jazdyq.
