Londonda erlikke taǵzym etildi
Jeńis kúnin Ulybrıtanııa astanasynda toılaǵandardyń biri Semeı qalasynyń týmasy, zeınetker Ǵazıza Anafına. Ol Londonda turatyn balalaryn kórý úshin Tumandy Albıonǵa qydyryp kelgen. Jeńis kúninde Anafına soǵys ardageri, atqyshtar devızııasynyń jaýyngeri bolǵan ákesi Qaldybek Imashevty eske alý úshin gúl shoqtarymen memorıal janyna keldi.
«Qazir endi ol kisi joq. Biz jylda 9 mamyr kúni Semeıdegi apa-sińililer bolyp, beıit basyna baryp, gúl shoqtaryn qoıyp, eske alamyz. Bizge jeńis syılaǵan ákemizge dán rızamyz. Mynda men birinshi ret kelip otyrmyn», deıdi zeınetker.
Eske alý rásimine postkeńestik elderdiń dıplomatııalyq mıssııalarynyń basshylary men qyzmetkerleri de qatysyp, gúldestelerin qoıdy. Sharanyń uıymdastyrýshysy brıtanııalyq Keńestik áskerı memorıal qory jáne Londonnyń Saýtýark okrýginiń merııasy. Taǵzym etý kezinde olar mıllıondaǵan adamnyń ómirin qıǵan surapyl soǵysta qan keshken sarbazdardyń aldynda basyn ıdi.
«Men búgingi is-sharaǵa Saýtýark okrýgy halqynyń atynan qatysý qurmetine ıe boldym. Ekinshi dúnıejúzilik soǵys kezinde Keńes áskerıleriniń qosqan ólsheýsiz úlesi aldynda basymyzdy ıemiz. Olar fashızmmen kúreste óz ómirlerin qurbandyqqa qıyp, bizge bostandyq syılady», deıdi Saýtýark okrýginiń meri Barrı Hargroýv.
Ádette bul jerge halyq óte kóp jınalatyn. Ásirese, soǵys ardagerleri bir-birimen qaýyshyp, máre-sáre bolatyn. Biraq ókinishke qaraı olardyń qatary sırep barady. Sondaı-aq pandemııa týdyrǵan qaýipke baılanysty kóbisi úılerinen shyǵa almaǵan. Shara uıymdastyrýshylarynyń aıtýynsha, eshkim de, eshteńe de umytylmaq emes.
«Kovıd týdyrǵan pandemııaǵa deıin Jeńis kúnin biz budan da kólemdi etip ótkizetinbiz. Londonnyń okrýgterinen kóptegen merler keletin. 90 jastaǵy ardagerlerdi de kóretinbiz. Biraq sońǵy eki jylda jaǵdaı ózgerdi», dedi óz sózinde Keńestik áskerı estelik qorynyń tóraǵasy Fılıpp Metıýs.
Keńestik áskerı estelik qorynyń qurmetti hatshysy Ralf Gıbsonnyń aıtýynsha, eskertkishti qoıýdaǵy basty maqsattardyń biri burynǵy KSRO elderiniń jeńisti jaqyndatýdaǵy úlesin halyq jadynda saqtaý. «Qazaqstan, Qyrǵyzstan, Grýzııa, Ýkraına, Reseı, Belarýs, Baltyq respýblıkalary birge áreket etti. Búginde KSRO ydyraǵanyna qaramastan bul memleketter natsızmniń mashınasyna qarsy jumyla kúrese bildi», dedi ol bizben áńgimesinde.
Keńes jaýyngerleri men azamattaryna arnalǵan eskertkish 20 jyldan astam ýaqyt buryn ashylǵan. Qoladan quıylǵan 3 metrlik memorıalda tómen qarap turǵan áıel beınelengen. Músinniń ústińgi jaǵynda qońyraý, tómeninde estelik jazýlar jazylǵan granıt taqta bar. Onyń astynda fashızmdi jeńýge úles qosqan elderden ákelingen topyraq kómilgen.
