Londonda Elbasy kitabynyń tusaýkeseri ótti
Іs-sharany QR Tuńǵysh Prezıdenti qory jáne Qazaqstan Respýblıkasynyń Ulybrıtanııa Birikken Koroldigindegi jáne Soltústik Irlandııadaǵy Elshiligi uıymdastyrdy.
Elbasy kitabynyń tusaýkeseri bıyl kóktemde qordyń bastamasymen Reseı Federatsııasynda - Máskeý jáne Sankt-Peterbýrg qalalarynda ótti. Sonymen qatar, kitap Mınsk, Bishkek, Tbılısı jáne Baký oqyrmandarynyń nazaryna usylynǵan bolatyn.
Tarıhı kitaptyń tusaýkeser rásimin Londonda QR Tuńǵysh Prezıdenti - Elbasy qorynyń atqarýshy dırektorynyń orynbasary Igor Rogov ótkizdi. Іs-sharaǵa Parlamentarılerdiń qarýsyzdaný men ıadrolyq qarýdy taratpaý qozǵalysynyń teń tóraǵasy, baronessa Sıýzan Mıller, Qazaqstan-Brıtan qoǵamynyń tóraǵasy Rýpert Gýdman, Ulybrıtanııa Parlamentiniń depýtattary, qoǵamdyq qaıratkerler, dıplomatııalyq korpýstyń ókilderi jáne basqalary qatysty.
«Qazaqstan Prezıdentiniń osy shyǵarmashylyq eńbegi árbir qazaqstandyq úshin óte jaqyn, óıtkeni elimizdiń táýelsiz memleket retinde qalyptasýy jyldaryn kórsetedi. Kitapta elimizde bolǵan kúrdeli úrdiske, betburysty sátterge tereń taldaý jasalǵan. Sonymen qatar, onda elimizdiń aldynda turǵan jańa mindetter aıqyndalǵan. Osynyń barlyǵy kitapty naǵyz tarıhı qujat retinde kórsetedi. Onyń qundylyǵy osynda», - dedi qordyń atqarýshy dırektorynyń orynbasary Igor Rogov.
Onyń aıtýynsha «Táýelsizdik dáýiri» kitaby jastar úshin erekshe paıdaly. «Egemendik jyldary qazaqstandyqtardyń erkin, belsendi, ashyq jańa býyny keldi. Bolashaqtyń irgetasyn qalaý úshin onyń qaınar kózin, óziniń tarıhyn bilý kerek. Eldiń bıiktikke qalaı qol jetkizgenin, qandaı syn-tegeýrinderdi eńsergenin túsinýi óte mańyzdy bolyp tabylady», - Igor Rogov.
Qor Elbasy kitabynyń tusaýkeserin shetelde uıymdastyrýdy jalǵastyrady, kezdesýler Berlınde, Parıjde, sondaı-aq Brazılıada ótedi.
Baronessa Sıýzen Mıller Qazaqstannyń ıadrolyq qarýsyz álem qalyptastyrýdaǵy naqty qadamdaryn atap ótti.
«Táýelsizdiktiń qysqa merziminde Qazaqstan aıtarlyqtaı jetistikterge qol jetkizdi. Táýelsizdik jarııalanǵanǵa deıin de 1989 jyly Qazaqstan álemde tuńǵysh bolyp synaq polıgonyn jabý úshin ıadrolyq synaqtarǵa qarsy halyqaralyq qozǵalysqa jol ashty», - dedi Sıýzen Mıller.
Kezdesý barysynda tanymal brıtandyq rejısser Andre Sıngerdiń Semeı ıadrolyq polıgonyndaǵy synaqtardyń saldary jáne ıadrolyq qarýsyz álem qozǵalysy týraly «Jel turǵanda» atty derekti fılmi kórsetildi.