Londonda Dýlat Isabekovtiń Bórte týraly pesasynyń tanystyrylymy ótti

LONDON. QazAqparat - Qazaqtyń jazýshy-dramatýrgi, QR Memlekettik syılyǵynyń laýreaty Dýlat Isabekovtiń Shyńǵyshannyń jary Bórtege arnalǵan pesasynyń álemdik tusaýkeseri Londonda ótti, dep habarlaıdy QazAqparat menshikti tilshisi Qazaqstan elshiliginiń Facebook-tegi paraqshasyna silteme jasap.

Qazaqstannyń Ulybrıtanııadaǵy Elshiliginiń uıymdastyrýymen, Eýrazııalyq shyǵarmashylyq gıldııasynyń (London) qoldaýymen «Bórte, álem patshaıymy» qoıylymynyń halyqaralyq tanystyrylymy boldy. Spektakl aǵymdaǵy jyldyń jeltoqsan aıynda Melbýrn qalasynda (Avstralııa) kórsetiledi, al kelesi jyly uıymdastyrýshylar trýppanyń bul spektaklymen Ulybrıtanııa men AQSh-qa gastroldik saparyn josparlap otyr.

«Dýlat Isabekov qazaq ádebıetiniń aqıyq klassıgi sanalady, onyń pesalary Eýropa men Azııada álemniń kóptegen tilderinde qoıylyp, al kitaptary jarty ǵasyrdan astam ýaqyt boıy synshylar men oqyrmandardyń moıyndaýyna ıe bolýda.

Ǵalamdy dúrliktirgen Shyńǵys hannyń ómirinde úlken ról atqarǵan dana áıel Bórte týraly osy qoıylymda onyń qıyn ómiri men uly jaýlaýshynyń taǵdyryndaǵy sheshýshi róli baıandalady», - dep jazylǵan Elshilik habarlamasynda.

Spektakldi klassıkalyq pesany mýzykalyq fragmentteri bar spektaklge aınaldyrǵan áıgili avstralııalyq rejısser ári kompozıtor Ýorren Ýılls qoıýda.

Melbýrndaǵy qoıylymǵa kórnekti avstralııalyq mádenıet jáne óner qaıratkerleri, sondaı-aq áleýmettik ınklıýzıvti Jas álem hory qatysady.

Joba Eýrazııa keńistigindegi halyqtardyń ulttyq mádenıetin ilgeriletý maqsatyn kózdeıtin brıtandyq qoǵamdyq uıym bolyp tabylatyn Eýrazııalyq shyǵarmashylyq gıldııanyń bastamasymen qolǵa alynýda. Atalaǵan uıym 2015 jyldan beri álemniń kóptegen elderinde halyqaralyq jobalardy sátti júzege asyryp keledi.

Foto: www.facebook.com/KazakhEmbassyUK