Londonda bý qozǵaltqyshymen júretin Rojdestvolyq ekspress saıahatqa shyǵady

ASTANA. KAZINFORM — Atalǵan poıyzben bir jarym saǵattyq sapardyń baǵasy 55 fýnttan 600 fýntqa deıin (37 myńnan 415 myń teńgege deıin) barady, dep habarlaıdy Kazinform agenttiginiń menshikti tilshisi.

Londonda Rojdestvo qarsańynda relsterge bý qozǵaltqyshymen júretin Rojdestvolyq ekspress shyǵýǵa daıyn. Baǵytty 1951 jyly jasalǵan, búgingi kúni brıtan temirjol romantıkasynyń sımvolyna aınalǵan «Brıtanııa» lokomotıvi qamtamasyz etedi.

Qonaqtardy astana boıynsha Vıktorııa beketinde aıaqtalatyn retrovagondarmen 90 mınýttyq aınalma saıahat kútip tur. Ekspress poıyzda jolaýshylardy Santa-Klaýs pen onyń elftary qarsy alady: olar shaǵyn spektaklder, mýzyka jáne barlyq jastaǵy jolaýshylarǵa arnalǵan ınteraktıvti qoıylymdar arqyly ǵajaıyp kóńil kúı syılaýdy ýáde etedi.

Kishkentaı jolaýshylarǵa arnalǵan syılyqtar, oıyndar jıyntyqtary, táttiler men sýsyndar daıyndalǵan. Eresekterge jańadan daıarlanǵan shaı nemese kofe, sondaı-aq jemis qosylǵan dástúrli rojdestvolyq pırog usynylady. Rojdestvolyq ekspress 20-22 jeltoqsan aralyǵynda júredi.

Uıymdastyrýshylar jalpy vagondaǵy standartty oryndardan bastap, vıntajdy shamdar men perdelermen bezendirilgen salondaǵy ústelderi bar jaıly kreslolarǵa deıin úsh deńgeıli servısti qarastyrǵan. Eń joǵary klass — jeke kýpeler, onda qupııalyq pen jaılylyq deńgeıi joǵaryraq.

Aıta keteıik, jańa jyl qarsańynda elimizde qandaı qosymsha poıyzdar iske qosylatyny belgili boldy.