Londonda Brıtandyq kıno jáne televızııa óneri akademııasynyń marapattary tabystaldy
ASTANA. KAZINFORM — Saltanatty shara Koroldik festıval-holda ótti. Brıtandyq kıno jáne televızııa óneri akademııasynyń (BAFTA) bas júldesi — úzdik fılm júldesin Rım Papasy saılaýy týraly trıller «Konklav» aldy, dep habarlaıdy BBC.
«Konklav» fılminen basqa «Úzdik fılm» nomınatsııasyna «Anora», «Brýtalıst», «Minsiz beıtanys» jáne «Emılııa Peres» fılmderi usynyldy.
Rejıssýra úshin júldeni Holokosttan aman qalǵan sáýletshi týraly úsh saǵattyq epıkalyq dramalyq «Brýtalıst» fılmi úshin Bredı Korbet aldy. Bul kategorııada nomınanttar arasynda sondaı-aq Shon Beıker («Anora»), Edvard Berger («Konklav»), Denı Vılnev («Dıýna: Ekinshi bólim»), Jak Odıar («Emılııa Peres») jáne Koralı Farja («Sýbstantsııa») boldy.
Amerıkalyq aktrısa Maıkı Medıson orystildi strıptızer boıjetkenniń ómirin baıandaıtyn «Anora» fılmindegi róli úshin úzdik aktrısa atandy.
«Úzdik akter» nomınatsııasynda Holokosttan AQSh-qa qashyp kelgen oıdan shyǵarylǵan majarlyq sáýletshi Laslo Tot týraly «Brýtalıst» fılminde basty róldi somdaǵan Edrıen Brodı úzdik tanyldy.
BAFTA syılyǵyn kóbinese «Oskarǵa» daıyndyq dep ataıdy – jeńimpazdardyń esimderi kóbine kınoakademıkterdiń daýys berý nátıjeleri boljaıdy. Bıylǵy «Oskar» syılyǵy 3 naýryzda tapsyrylady.
«Anora» fılminde ekinshi plandaǵy róli úshin usynylǵan reseılik akter ıÝra Borısov júldesiz qaldy — ony Kıran Kalkın («Naǵyz aýyrsyný») aldy.
Ol Borısovtan sondaı-aq «Altyn globýs» tabystalýynda da ozyp shyqty.
Aǵylshyn tilindegi emes eń úzdik fılm bolyp rejısser Jak Odıardyń «Emılııa Peres» krımınaldyq komedııalyq mıýzıkli tanyldy.
Brıtandyq rejısser Frants Bemniń Reseıdiń Ýkraınaǵa qarsy keń aýqymdy soǵysynyń bastalýy týraly «Tas, qaıshy, qaǵaz» fılmi «Brıtandyq úzdik qysqametrajdy fılm» nomınatsııasynda úzdik tanyldy. Basty róldi somdaǵan — ýkraınalyq akter Aleksandr Rýdınskıı.
* Úzdik fılm — «Konklav»
* Kórnekti brıtandyq fılm — «Konklav»
* Úzdik aktrısa — Maıkı Medıson («Anora»)
* Úzdik akter — Edrıen Brodı («Brýtalıst»)
* Ekinshi plandaǵy úzdik aktrısa — Zoı Saldana («Emılııa Peres»)
* Ekinshi plandaǵy úzdik akter — Kıran Kalkın («Naǵyz aýyrsyný»)
* Úzdik rejısser — Bredı Korbet («Brýtalıst»)
* Aǵylshyn tilindegi emes eń úzdik fılm — «Emılııa Peres»
* Balalar men otbasyna arnalǵan úzdik fılm — «Ýolles pen Gromıt: Eń jabaıy kek»
* Úzdik brıtandyq qysqametrajdy fılm — «Tas, qaıshy, qaǵaz».
Eske sala ketsek, ótken aıda amerıkalyq kıno óneri akademııasy «Oskar» syılyǵy úmitkerleriniń tizimin jarııalady.