Londonda Batys Eýropadaǵy eń bıik «Shard» ǵımaratynyń qaraý alańy ashyldy
ASTANA. 2 aqpan. QazAqparat - Ulybrıtanııanyń astanasynda Batys Eýropadaǵy aspanmen talasqan eń bıik «Shard» ǵımaratynyń qaraý alańy ashyldy. Aıta keteıik, ǵımarattyń bıiktigi 309,6 metrdi quraıdy, onyń qaraý alańynan qalanyń 360 gradýstyq panoramasy kórinedi, dep habarlady ITAR-TASS.
Qaraý alańyna shyǵý úshin bılettiń quny eresekterge 24,95 fýntty (39 dollar), balalar úshin 18,95 fýntty (30 dollar) quraıdy.
Biregeı ǵımarat pıramıda tektes salynǵan. Ol 11 myń shyny panelmen jabdyqtalǵan. Onyń qurylysyna 1,5 mlrd. fýnt (2,35 mlrd. dollar) somasynda qarajat jumsaldy.
Ǵımarattyń birinshi qabatynda shynymen kómkerilgen zal bar, onda arnaıy aǵashtar men ekzotıkalyq kóshetter otyrǵyzyldy. Ekinshi qabatta saýda ortalyǵy ornalasqan. Úshinshi qabattan 28-shi qabatqa deıin keńse bólmeleri men qysqy baq, 31-33 qabattarda meıramhanalar ornalasqan. 34-52 qabattarda 200 nómerlik «Shangrı La» qonaq-úıi bar. Al 53 qabattan 65-shi qabatqa deıin árqaısysynyń quny 50 mln. fýntty (79 mln. dollar) quraıtyn on jeke apartament oryn tepken.
