Londonda antımıgranttyq jáne Palestınany qoldaý sherýlerine ondaǵan myń adam shyqty
ASTANA. KAZINFORM – Londonda antımıgranttyq marsh pen Palestınany qoldaý aktsııasyna ondaǵan myń adam qatysty, dep habarlaıdy DW.
Qalanyń ortalyǵynda ótken sherýlerdiń biri ýltraońshyl belsendi Stıven ıAkslı-Lennon uıymdastyrǵan aktsııa boldy. Marshqa qatysýshylar bosqyndar sanynyń kóbeıýine jáne jappaı mıgratsııaǵa qarsy pikir bildirgen.
Ulybrıtanııanyń premer-mınıstri Kır Starmer sherý bastalmaı turyp uıymdastyrýshylardy qoǵamda óshpendilik pen alaýyzdyqty ádeıi qozdyrýǵa tyrysty dep aıyptady.
Málimetke sáıkes, Tommı Robınson uıymdastyrǵan 2025 jylǵy qyrkúıektegi antımıgranttyq aktsııaǵa shamamen 150 myń adam qatysqan.
Sonymen qatar Londonda Palestına halqynyń «Nakba» – «apat» kúnine arnalǵan jyl saıynǵy sherý ótti. Bul kún 1948 jyly Izraıl memleketi qurylǵan kezde shamamen 700 myń palestınalyqtyń óz jerinen kóshirilýimen baılanysty.
Eki aktsııa qatysýshylary arasynda qaqtyǵys bolmaýy úshin qala kóshelerine 4000 polıtsııa qyzmetkeri jumyldyrylǵan.
London polıtsııasy málimetinshe, kún ortasyna deıin túrli quqyq buzýshylyqtar boıynsha 31 adam ustalǵan. Soǵan qaramastan, quqyq qorǵaý organdary eki sherý de «eleýli oqıǵalarsyz» ótkenin atap ótti.
Aıta keteıik, buǵan deıin Ulybrıtanııada mınıstr Djess Fıllıps narazylyq retinde qyzmetinen ketkeni habarlandy.
