Londonda almatylyq sýretshiniń kórmesi ótti

LONDON. QazAqparat - Londonda almatylyq sýretshi Aıǵana Ǵalıdyń kórmesi uıymdastyryldy.

Avtor abstraktsııa stılinde salynǵan sýretteriniń jańa toptamasyn jaryq taqyrybymen baılanystyrǵan, dep habarlaıdy QazAqparat tilshisi.

Jarqyraǵan sharlar, ımpýlstik elektr aǵyndary, sary sáýleler – munyń bári Aıǵana Ǵalıdiń sýretterinde kórinis tapqan. Avtor óz eńbekterinde jaryqpen shaǵylysyp, ártúrli keıipke engen zattardy beıneleýge tyrysqan. «Kartınalar múldem basqa tilde sóıleıdi. Kvanttyq fızıka nemese kosmologııa tili me dersiń», - deıdi sarapshylar.

Aıǵana sýretterine ulttyq reń berip, kartınalaryn «Shańqobyz», «Kıiz úı», «Qosyn» jáne «Órnek» dep ataǵan.

«Avtordyń tól mádenıetine óte jaqyn ekendigin jáne ony joǵary baǵalaıtynyn anyq ańǵarýǵa bolady. Ol kóptegen jumystary arqyly Uly daladan bastaý alatyn Táńirshildik ıdeıasyn jetkizýge tyrysqan. Biraq onyń shyǵarmashylyǵynyń dinge esh qatysy joq, abstraktylyq óner dep baǵalar edim», deıdi kórme kýratory, sarapshy Nıko Kos Erl.

Aıǵana Ǵalı óz shyǵarmashylyǵynda kenep pen qaǵazdan bastap, toqyma men qolaǵa deıin paıdalanady. Kóp salaly sýretshi - Almaty qalasynyń týmasy, ákesi qazaq, sheshesi grýzın ultynan. Aıǵana álemniń túkpir-túkpirinde kórmeler ótkizip, týyndylary arqyly halqymyzdyń baı mádenı murasyn nasıhattaýmen keledi. Ókinishke qaraı, kórmeniń ashylýyna Aıǵana, kele almady.

«Menińshe, kez-kelgen qazaqstandyq sýretshi úshin shetelderde kórmelerge qatysyp, álemdik mádenıetpen bite qaınasý óte mańyzdy. Biraq solaı bola tura avtor óz únin saqtaı bilý kerek. Meniń baqytyma oraı, jumystarym zor suranysqa ıe jáne dúnıejúzi boıynsha jeke adamdardyń úılerine nemese murajaılarǵa qoıylǵan», deıdi Aıǵana Ǵalı.

«Aıǵana Uly dalada týyp-ósti. Men álemniń ol bóligin eshqashan kórgen emespin. Menińshe, Aıǵana, sanaly túrde, bálkim beısanaly túrde týǵan jeriniń myqtylyǵyn pash etip jatyr. Men Qazaqstanǵa baryp, saıahattaǵym keledi», deıdi kórermenderdiń biri Keıt Breın.

Bir aıǵa sozylǵan kórmeniń keıbir kartınalary óner jármeńkelerine qoıylyp, saýdaǵa shyǵarylady. Aldaǵy ýaqytta Aıǵana Ǵalı Amerıkada jeke kórmesin ótkizýdi josparlap otyr. Budan bólek sýretteri kitap bolyp basylyp, oqyrman nazaryna usynylmaq.