Londonda álemdegi eń qymbat páter satyldy
ASTANA. Tamyzdyń 11-i. QazAqparat - Londonda páter baǵasyna álemdik rekord ornatyldy. Gaıd-parkte ornalasqan penthaýstardyń biri 220 mıllıon AQSh dollaryna satyldy, dep habarlaıdy Utro.ru saıty.
Brıtandyq buqaralyq aqparat quraldarynyń habarlaýynsha, eki qabatta ornalasqan páterdiń terezeleri oq ótkizbeıtindeı etip saýyttalǵan, aýa tazalaıtyn júıesi men shabýyl jasalǵan jaǵdaıda adamdar panalaı alatyn seıf-bólmesi bar. Páterdi satyp alǵan adamnyń aty-jóni jarııa etilmeı otyr, degenmen, beıresmı málimetter boıynsha, ony Parsy shyǵanaǵy elderi biriniń munaı magnaty satyp alǵan.
Rekordtyq baǵaǵa satylǵan páter ornalasqan úıdi ataqty brıtandyq sáýletshi ser Rodjers jobalaǵan. Bir-birimen qosylǵan tórt munaradan turatyn úıdiń qurylysy aıaqtalýǵa jaqyn.
