Londonda aq násildini arashalaǵan afroamerıkalyqtyń áreketi jurtty súısintti
LONDON. CNN – QazAqparat – Londonda afroamerıkalyq azamat aq násildi jigitti yzaly demonstranttar tobynan alyp shyqty. Bul týraly QazAqparat CNN-ge silteme jasap habarlaıdy.
Patrık Hatchınsonnyń janqııarlyq áreketi túsip qalǵan sýret búkil álemge tarady. Jeksenbi kúni Hatchınson CNN-ge bul onyń qatysqan alǵashqy Black Lives Matter narazylyq sharasy ekenin aıtqan.
Eske salaıyq, Londondaǵy jáne búkil álemdegi narazylyq bildirýshiler polıtsııa qyzmetkerleriniń qolynan qaza tapqan afroamerıkalyqtardyń óliminen keıin polıtsııa jumysyn reformalaýdy talap etip, kóshege shyqty. Qaıtys bolǵandardyń qatarynda Mınneapolıste kóz jumǵan Djordj Floıd pen Atlantadaǵy Reıshard Brýks bar. Hatchınson CNN-ge bergen suhbatynda senbide mıtıngige kelgen kezde, narazy toptyń soqqylarynan ózin qorǵaýǵa tyrysyp, baspaldaqta jatqan aq násildi jigitti kórgenin aıtty.
Hatchınson sol sátte bul adam qarsy toptyń ókili ekenine de qaramaǵanyn aıtýda. Hatchınson men onyń dostary jaraly azamatty qorshap alyp, sodan keıin Patrık ony polıtsııa ýchaskesine jetkizý úshin ıyǵyna kóterip alǵan. Hatchınsonnyń aıtýynsha, soǵan qaramastan narazy top aq násildi adamǵa soqqy jasaýdy toqtatpaǵan.
Hatchınson qutqarǵan er adamnyń aty ázirge belgisiz.
Senbidegi narazylyqtardan keıin polıtsııa 100-den astam adamdy qamaýǵa aldy.
Patrıktiń aıtýynsha, ózi narazylyq bildirýge shyqqan. Ol adamzat násildik kemsitýshilikti jeńip, beıbit ómir súre alady dep úmittenedi.
«Bárimiz úshin teńdik bolǵanyn qalaımyn. Men – ákemin, atamyn. Balalarym, nemerelerim, jıenderim jaqsy álemde ómir súrse eken deımin», - dedi Hatchınson.
Eske sala keteıik, 25 mamyr kúni Djordj Mınneapolıste polıtseılerdiń qolynan qaıtys boldy. Ony ustaý barysynda Derek Shovın toǵyz mınýttaı tizesimen moınynan basyp otyrǵan.
AQSh, Kanada, Ulybrıtanııa, Germanııa men álemniń basqa da qalalarynda Djordj Floıdtyń óliminen keıin narazylyqtar men tolqýlar bastaldy.
