Londonda Abaıdyń aǵylshyn tilindegi jınaǵy jaryq kórdi
Kitaptyń basty ereksheligi uly oıshyl eńbekteriniń qazaq tilinen tikeleı, túpnusqaǵa barynsha jaqyn aýdarylýynda. Buǵan deıin Abaıdyń óleńderi men qara sózderi orysshadan tárjimalanǵan bolatyn.
Jobany Ulttyq aýdarma bıýrosy jáne álemge áıgili Kembrıdj ýnıversıtetiniń baspasy Abaıdyń 175 jyldyǵy qarsańynda jáne «Rýhanı jańǵyrý» baǵdarlamasy aıasynda júzege asyryp otyr. Tusaýkeser Brıtanııalyq ulttyq kitaphanada ótedi dep josparlanǵan bolatyn. Biraq Anglııada ekinshi jalpyulttyq lokdaýnnyń jarııalanýyna baılanysty onlaın formatta uıymdastyryldy. Abaı eńbekteri buǵan deıin Keńes ıdeologııasyna sáıkes, ishinara ǵana jáne orys tilinen tárjimalanyp kelgen bolatyn. Endi ol barynsha tolyq jáne óz mánin joǵaltpaǵan erekshe jınaq retinde tarıhta qalmaq.
Sharada sóz alǵan QR Mádenıet jáne sport mınıstri Aqtoty Raıymqulovanyń aıtýynsha, aǵylshyn tili mıllıardtan astam adamnyń ortaq tili. Abaıdyń tolyq shyǵarmalar jınaǵynyń aǵylshyn tiline aýdarylýyn aqyn shyǵarmalary mıllıard oqyrmanǵa usynyldy degen sóz.
Ulttyq aýdarma bıýrosy tárjima isine brıtanııalyq tájirıbeli aýdarmashylardy tartqan. Sońǵylary qazaqshadan týra aýdarylǵan mátindi aǵylshynnyń ádebı tilinde sóıletken. Aýdarmashylar aldymen uly aqynnyń shyǵarmashylyǵyn tereń zerttep, onyń tuńǵıyǵyna boılaǵandaryn aıtady.
Brıtanııalyq tanymal aýdarmashy ári aqyn Shon O’Braıenniń paıymdaýynsha Abaı óleńderine aǵylshyn tilinde jan bitirý ońaıǵa túspegen. «Aýdarmanyń sátti shyǵýy úshin kásibı kúsh-jigerimdi aıamadym. Áýezdiligin, mánin tolyq jetkize bilý, sóılem qurylymyn saqtaý, dramatızmdi ustaný, bári-bári men úshin óte mańyzdy boldy», -deıdi O’Braıen.
Kembrıdj ýnıversıteti baspasynyń basshysy Pıter Fıllıps: «Bul jobany júzege asyra otyryp, qazaqstandyq seriktesterimizben birge jahandyq aýdıtorııaǵa qazaqtyń baı murasyn jetkizemiz degen úmittemiz. Jınaqqa aqynnyń 145 óleńi, 3 poemasy jáne Qara sózderi engizilgen», dedi.
Bul kommertsııalyq joba emes jáne paıda tabýdy kózdemeıdi. Ázirge shekteýli tırajben shyǵarylatyn kitaptar Qazaqstannyń Ulybrıtanııadaǵy elshiliginiń yqpal etýimen jergilikti ýnıversıtetter men kitaphanalarǵa taratylatyn bolady. Budan bólek ony onlaın da oqý múmkin bolmaq.
