Londonda 7 qabatty The Beatles murajaıy ashylady
ASTANA.KAZINFORM - London ortalyǵynda Beatles tobynyń qurmetine jańa ınteraktıvti murajaı ashylady. Onyń ereksheligi – top 1969 jyldyń 30 qańtarynda sońǵy ret óner kórsetken áıgili shatyrǵa shyǵý múmkindigi, dep habarlaıdy AR.
Keńistik Savile Row kóshesindegi áıgili ǵımaratta ornalaspaq. Onda top Let It Be albomyn jazyp, sońǵy ret kópshilik aldynda óner kórsetken.
Beatles negizin qalaǵan Apple Corps Ltd. top jankúıerleri úshin jańa jeti qabatty ortalyq qurylǵanyn jarııalady. Joba 1960 jyldardyń sońynda toptyń shtab-páteri ornalasqan Savile Row kóshesindegi tarıhı ǵımaratta ornalasady.
Murajaıǵa ınteraktıvti eksponattar, muraǵattar jáne stýdııalyq keńistik ornalastyrylady.
Pol Makkartnı jaqynda Savile Row-ǵa oralǵanyn jáne joba daıyndyǵyna tańǵalǵanyn aıtty.
- Bul qabyrǵalarda, ásirese shatyrda keremet estelikter saqtalǵan. Komanda shynymen tańǵajaıyp josparlar oılap taýypty, - dedi mýzykant.
Rıngo Starr jańa ortalyqty «úıge oralý» dep atady. Naqty ashylý kúni áli jarııalanǵan joq, biraq joba 2027 jyly iske qosylýy tıis.
The Beatles tobyna degen qyzyǵýshylyq top tarap ketkennen keıin de joǵary deńgeıde qala beredi. Qazirgi ýaqytta mýzykanttar týraly tórt ómirbaıandyq fılm ázirlenip jatyr. Pıter Djeksonnyń The Beatles: Get Back derekti serııasy «Let It Be» dáýirine jáne áıgili shatyrdaǵy kontsertke nazar aýdartty.
2023 jyly toptyń muraǵattyq jazbalaryna negizdelgen jasandy ıntellekt arqyly jasalǵan «Now and Then» áni de jaryq kórdi. Án 42 jyldan keıin alǵash ret BRIT syılyǵyna usynyldy.
