Londonda 35 el Ormýz buǵazyndaǵy kemelerdi qorǵaý máselesin talqylaıdy

ASTANA. KAZINFORM — Ulybrıtanııanyń premer-mınıstri Kır Starmer Ormýz buǵazynda keme qatynasyn qaıta jandandyrý boıynsha halyqaralyq kezdesýge daıyndyq júrip jatqanyn málimdedi, dep habarlaıdy Sky News.

Brıtan premer-mınıstri Kır Starmer bastamaǵa qazirdiń ózinde 35 el qosylǵanyn habarlady. Onyń aıtýynsha, alǵashqy kelissózder jaqyn arada Londonda ótedi.

Negizgi maqsat — aımaqta navıgatsııa erkindigin qalpyna keltirýge kómektesetin dıplomatııalyq jáne saıası qadamdardy ázirleý.

Talqylaýǵa Germanııa, Frantsııa, Italııa, Japonııa, Nıderlandy, sondaı-aq Parsy shyǵanaǵy elderi, onyń ishinde BAÁ men Bahreın qatysady. Buǵan deıin bul memleketter qaýipsiz keme qatynasyn qamtamasyz etý úshin birlesken sharalar qabyldaǵan.

— Osy aptada Ulybrıtanııanyń syrtqy ister mınıstri Ivett Kýper kezdesý ótkizedi, onda memleket ókilderi alǵash ret birge jınalady, — dep atap ótti Starmer.

Eske salaıyq, álemdik munaı tutyný kóleminiń 20%-y (kúnine shamamen 20 mıllıon barrel) ótetin Ormýz buǵazy munaı jetkizý turǵysynan strategııalyq mańyzǵa ıe. Biraq bul buǵazdaǵy qozǵalys is júzinde toqtap qalǵan bolatyn.

21 naýryz kúni AQSh bir kún buryn tankerlerge tıelgen Iran munaıyn satý jáne tasymaldaý operatsııalaryn júrgizýge ruqsat berdi. Tıisti sheshim Sheteldik aktıvterdi baqylaý basqarmasy jarııalaǵan jalpy lıtsenzııada bekitilgen.

Ormýz buǵazy Taıaý Shyǵystaǵy qaqtyǵys saldarynan jabylǵan bolatyn. Iran buǵazdy buǵattaý arqyly AQSh-tyń meselin qaıtarǵysy kelgenimen, álem elderine shıkizat tasymalynyń tejelgeni ońaıǵa soqpady. Teńizdegi tartystyń aqyry qandaı bolmaq, munaı baǵasynyń ósýi Qazaqstanǵa paıda ákele me? Buǵan deıin Kazinform tilshisi búkil álem nelikten Ormýz buǵazyna kóz tigip otyrǵanyn saralaǵan edi.