London jáne Sochı olımpıadalarynda olja salý – basty maqsatymyz – M.Ońdaǵanov

Sonymen birge, árıne, basty maqsat - London jáne Sochı olımpıadalarynda el namysyn qorǵap, olja sala alatyn sportshylardy daıarlaý. Batys qazaqstan oblystyq týrızm, dene shynyqtyrý jáne sport basqarmasynyń bastyǵy, QR eńbek sińirgen jattyqtyrýshysy Músilim Ońdaǵanov óz oı-tolǵamymen osylaısha bildirdi.

Astana men Almatyda ulanasyr saltanatpen aıaqtalǵan 7-qysqy Azııa oıyndaryna Batys Qazaqstannan 26 sportshy qatysty. Qur qatysyp qana qoımaı bir altyn, qos qola medaldi qanjyǵalaryna baılap keldi. Azıada chempıony atanǵan dopty hokkeıshilerimiz sporttyń osy túrinen el namysyn qorǵap júrgen Qazaqstandaǵy jalǵyz komanda. Dúnıejúzilik dodada Qazaqstan quramasy Reseı men Shvetsııaǵa ǵana ese jiberip, Fınlıandııamen ıtjyǵys túsip júr.

Eki qolany enshilegen short-trekten Qazaqstan quramasynyń toqsan paıyzyn oraldyqtar qurap otyr. Músilim Ońdaǵanov y óz isine shyn berilgen jankeshti jattyqtyrýshy Mádiǵalı Qarsybekovtyń eńbegin aıryqsha baǵalaıdy.

-Olımpıadadan bastap álem chempıonattaryna deıingi baıraqty básekelerdiń talaıyna kýá bolǵan edim, - dep sabaqtady sózin M. Ońdaǵanov, - biraq, Astanadaǵy Azııa oıyndarynyń ashylý saltanaty meni erekshe tańqaldyrdy. Meni ǵana emes kelgen barlyq qonaqtardy da súısintti. Tamasha uıymdastyrylǵan saltanattan keıin tartysty jarys kúnderi bastalǵanda komandamen birge júrdim. Dopty hokkeıden sózsiz myqtymyz. Sochı olımpıadasy baǵdarlamasyna dopty hokkeı kirgiziletin bolsa qola júldege talasýdan úmitimiz bar. Meniń erekshe aıtqym keletini short-trektiń tabysy. Japonııa, Koreıa, Qytaı úshtigi Azııada ǵana emes, álemde myqty. Solarmen teń dárejede kúsh synasyp, júldeger atanýdyń ózi erlik. Bir sózben aıtqanda medaldiń dámin tattyq, tábetimiz oıandy. Kúni keshe ǵana jasóspirimder Italııadaǵy álem chempıonatynda tórtinshi orynǵa taban tiredi. Onda da birinshi kele jatyp bir sportshymyz qulap qalǵandyqtan júldeden tys qaldyq. Osylardyń barlyǵy - biz ustanǵan baǵyttyń durys ekendigin kórsetedi. Sport - lotereıa bıleti emes, munda kezdeısoq utys joq. Birden sheber sportshyny ázirleý múmkin emes, bárine ýaqyt kerek, qoldaý kerek. Baqytymyzǵa oraı bizde ýaqyt ta, qoldaý da jetkilikti. Oblys basshysy qarjy qarajat máselesin sheship berdi. Sportshylardyń rýhyn kóterip tastady. Oblystyq máslıhat depýtattaryna da úlken alǵysymdy bildirgim keledi. Oblys ákiminiń jáne depýtattardyń qoldaýy arqasynda bıyl Oralda tennıs korty salynady, dene shynyqtyrý saýyqtyrý kesheniniń qurylysy júredi, sportqa daryndy balalarǵa arnalǵan mektep ınternattyń ǵımaratyna kúrdeli jóndeý jasalady.

Aıta ketý kerek, Beıjiń olımpıadasy Qazaqstan qorjynyn kezekti medaldarmen molaıtty. Іshinde Batys Qazaqstan atynan synǵa túsken, burynǵy reseılik balýan Taımuraz Tıgıev alǵan bir kúmis te bar. Ýaqytynda bul júldege shyn júrekten qýanǵandar da, «sportshyny shetten shaqyrý qanshalyqty qajet boldy» dep qomsynǵandar da kezdesti. Árıne, árkimniń óz pikirin bildirýge quqy bar. Degenmen, álemdik sporttaǵy myna bir úrdisti joqqa shyǵarýdyń jóni bolmas. Sońǵy birneshe olımpıadanyń balýandar básekesi negizinen Qap taýynyń ókilderi arasynda ótip júr. Kórshimiz Reseıdiń ulttyq quramasynda qazir birde bir orys joq, soǵan qarap olar osetınder men daǵystandardy ózekke teýip jatyr deýge kelmeıdi. Sol qapqazdyqtarmen birge jattyǵyp, syralǵy bolǵan orys balýandarynyń London kileminde boı kórsetpesine kim kepil. Ziltemir kóterýden Olımpıadanyń úsh dúrkin chempıony, Túrkııanyń qaharmany Naım Súleımenoǵlynyń ulty bolgar. Bolgar Súleımenoǵlynyń Túrkııa úshin shelektep tókken terin kórgen túrik ulany Halıl Mýtlý artynsha olımp shyńyn baǵyndyrdy. Keshegi Beıjińde Qytaı sapynda rıngke shyǵyp, qola júldeni julyp áketken óz qandasymyz Qanat Іslámdi qaıda qoıasyz. Mıllıardtan astam qytaı senim artqan on bir oǵlannyń ishinde qazaq jigiti bolǵanyn nege maqtanyshpen aıtpaımyz! Ajdahany aýyzdyqtaǵan qas batyr áne sol emes pe! ıAǵnı, dodaǵa tek dúldilder qosylýy kerek. Demek, sport ta saıasattyń bir quraly.

Tıgıevtiń tegeýrinin álem kórdi. Shaqyrsaq tek eń myqtyny shaqyrdyq, ózimizde joqty shaqyrdyq. Shyn júıriktiń jeńisin kózben kórgen inilerimiz ben qaryndastarymyz sportqa qyzyǵyp, kóptep kelse dedik. Qazir, Qudaıǵa shúkir, maqsatymyzǵa tolyq jetpegenmen, bir taban jaqynbyz dep aıta alamyn. Grek-rım kúresinen jastar arasyndaǵy álem chempıony Artýr Úmbetqalıev baýyrymyz ulttyq quramanyń beldi balýanyna aınaldy. Bokstan Oraldyń túlekteri, keshe ǵana biri Qazaqstan chempıony atanǵan, ekinshisi kúmis júldeger bolǵan aǵaıyndy Danııar jáne Dáýren Eleýsinovterge senim artamyn. Endi shetten bilikti bapkerler shaqyrýym múmkin, mysaly, qazir mánerlep syrǵanaý sportynan máskeýlik bapkerlermen kelissózder júrýde. Biraq naqty aıtatynym, shetten sportshy shaqyrmaımyn. Ózimizdiń jergilikti sportshylardy tárbıeleıtin bolamyz. Beıjińge jeti adam barsa, London olımpıadasyna da sodan kem túspeýimiz kerek. Kúmis júlde - basty nysana, biraq altyn alsaq, «renjı» qoımasymyz anyq».

Atap óterligi, Londonǵa ázirlik búginnen bastalǵan. Dáýren men Danııar Astanada, bapkerlerdiń kóz aldynda júr. «Zeınetke» shyqqandaı kóringen sadaq atý sheberi Elena Plotnıkova qoramsaqqa qaıta qol salypty. Elenanyń senimdi serigi Anastasııa Bannova da babynda. Eskek esýden Azııa oıyndarynyń júldegeri Alekseı Dergýnov bar, jergilikti qyzdar boksynyń qarqyny da jaman emes. Buǵan bir jaǵynan sońǵy jyldary óńirde buqaralyq sporttyń qanat jaıa damýy sebep bolǵany sózsiz. Qazaqstan Respýblıkasynyń bıylǵy jazǵy spartakıadasyna Batys Qazaqstan oblysy óz tarıhynda tuńǵysh ret sporttyń 45 túrinen qatysady. Buıyrsa, sáýir aıynyń sońyna taman Oralda bokstan úlken halyqaralyq týrnır ótpek. Oǵan Reseı men Kýbadan bylǵary qolǵap sheberleri qatysady dep kútilýde. Fýtboldan Oraldyń «Aqjaıyq» komandasy bıylǵy maýsymda premer-lıga joldamasy úshin kúrespek. Bas bapkeri - Andreı Chernyshov. Legıonerden qalǵany Gok Habıb, basqalary baqytyn ózge klýbtardan izdep ketken.

«Ótken jyly Sakı Mozes, Vıktor Komlenok sekildi sheber oıynshylarmen tize qosyp oınaǵan jergilikti jigitterdiń býyndary qataıyp, buǵanalary bekidi. Sondyqtan, premer lıga joldamasy biz úshin arman emes, maqsat. Qoryta aıtqanda, mindet aıqyn, tapsyrma túsinikti. Oıǵa alǵan oryndalsa, jańa jeńisterdiń tóbesi kórinip tur», - dep túıindedi oıyn M.Ońdaǵanov.