London Ýkraınany qalpyna keltirýge 60 mıllıard dollar bólmek

LONDON. QazAqparat - Beısenbi kúni Londonda aıaqtalǵan Ýkraınany qalpyna keltirý jónindegi halyqaralyq konferentsııaǵa qatysýshylar Kıevke taıaý jyldary 60 mıllıard dollar bólýge ýáde berdi, dep habarlaıdy QazAqparat tilshisi.

21-22 maýsym kúnderi ótken konferentsııaǵa 59 eldiń mınıstrleri, bıznes ókilderi jáne basqa da resmı tulǵalar qatysty.

Dúnıejúzilik banktiń baǵalaýynsha, Ýkraınany qalpyna keltirýdiń jalpy qajettiligi 411 mıllıard dollardy quraıdy, onyń 14 mıllıardy aǵymdaǵy jyly qajet.

«Eýroodaq qalpyna keltirý jáne qaıta qurý úshin 50 mıllıard eýroǵa deıingi kópjyldyq qarjylandyrý mehanızmin jarııalady. AQSh Ýkraınaǵa qosymsha 1,3 mıllıard dollar, onyń ishinde mańyzdy ınfraqurylymdaryn jańartýǵa 675 mıllıon dollar bóletinin jarııalady», - delingen konferentsııany uıymdastyrýshylardyń birlesken málimdemesinde.

Sondaı-aq, qujatta Ulybrıtanııa Dúnıejúzilik Banktiń 2027 jylǵa deıin qosymsha nesıelendirýin qoldaý úshin taǵy 3 mıllıard dollar kepildeme, sondaı-aq shuǵyl qajettilikterge 240 mıllıon fýnt sterlıng bóletinin aıtty. Shveıtsarııa 2027 jylǵa deıin qoldaý kórsetý úshin taǵy 1,5 mıllıard shveıtsarııalyq frank bóletinin jarııalady.

Tımýr Dúısekeev