London týrnıri: Elena Rybakına jartylaı fınaldan tys qaldy
ASTANA. KAZINFORM — Qazaqstannyń birinshi, álemniń 2-raketkasy Elena Rybakına London (Ulybrıtanııa) WTA 500 týrnıriniń jartylaı fınalyna shyǵa almady.
Qazaqstandyq tennısshi shırek fınalda álemdik reıtıngide 73-oryndaǵy ulybrıtanııalyq Ketı Býltermen betpe-bet keldi.
Beısenbi kúngi oıyndar keıinge qaldyrylǵandyqtan, 12 maýsymda tennısshilerge eki match ótkizýine týra keldi. K.Býlter ekinshi aınalymda rýmynııalyq Jaklın Krıstıanmen básekesi 1 saǵattan astam ýaqytqa sozyldy. Al E.Rybakına germanııalyq Tatıana Marııamen kezdesýge 2 saǵat 9 mınýtyn jumsady.
Sondyqtan birshama tyń kóringen K.Býlter birinshi partııada esep 5:5 bolǵan mezette breık jasaı bildi – 7:5.
Ekinshi sette Elena 3:1 esebimen alǵa ketti. Sosyn setti taǵy bir breıkpen túıindedi – 6:2.
Úshinshi, sheshýshi partııada Rybakına óz múmkindikterin paıdalana almady – 4:6.
Eki saǵat 38 mınýtqa sozylǵan tartysty básekede E.Rybakına 9 eıspen birge 14 breık-poınttyń tek ekeýin óz esebine jazdy. Býlter 2 eıs, 2 breıkpen (7 breık-poınt) kózge tústi.
K.Býlter fınalǵa shyǵý úshin álemniń 76-raketkasy, horvatııalyq Donna Vekıchpen talasady. Ol shırek fınalda reıtıngide 106-satydaǵy chehııalyq Karolına Plıshkovany utty – 6:4, 4:6, 6:3.
Qazaqstannyń juptyq syndaǵy birinshi, álemniń 6-raketkasy Anna Danılına da Londonda jartylaı fınaldan tys qaldy.
Serbııalyq Aleksandra Krýnıchpen dodanyń 1-raketkasy bolyp tirkelgen A.Danılına shırek fınalda ulybrıtanııalyq Olıvııa Nıkolls – slovakııalyq Tereza Mıhalıkovaǵa jol berdi – 4:6, 4:6.
Eske sala keteıik, budan voleıboldan Elena Rybakınanyń London týrnırinde ótken jylǵy chempıondy jeńgenin jazǵan edik.
