London soty «Qazaqstan qaǵazy» kompanııasy eks-basshylarynyń appelıatsııalyq shaǵymyn qabyldamady
ALMATY. QazAqparat - London appelıatsııalyq soty «Qazaqstan qaǵazy» kompanııasynyń eks-basshylary Maqsat Árip pen Baǵlan Júnistiń appelıatsııalyq shaǵymyn qabyldamady. Bul týraly «Qazaqstan qaǵazy» AQ baspasóz qyzmetinen habarlady.
Esterińizde bolsa, 2013 jyldyń tamyzynda London kommertsııalyq soty atalǵan tulǵalardy 150 mln. AQSh dollary kóleminde qarjy jymqyrdy dep aıyptap, olardyń álem boıynsha jınaqtalǵan qarjysyn paıdalanýǵa tyıym salǵan bolatyn. Keıinnen Maqsat Árip qarjyǵa tyıym salý týraly sheshimdi teristeý týraly appelıatsııalyq sotqa shaǵym túsirgen edi. 2 sáýirde London appelıatsııalyq soty «Qazaqstan qaǵazy» kompanııasynyń eks-basshylary Maqsat Árip pen Baǵlan Júnistiń 72 mln fýnt qarjysyn tyıym salýǵa qarsy jazǵan appelıatsııalyq shaǵymyn qabyldamady. Aıyptalyp otyrǵan tulǵalar ózderin aıyptaýǵa negiz bar ekendigin moıyndaı otyryp, Qazaqstan zańnamasy boıynsha sot shaǵymy 3 jyldan ótken merzimde qaralmaıtynyn aıtyp qorǵandy. Lord-sýdıa Djekson óz kezeginde aıyptalyp otyrǵandardyń shaǵymnyń eskirgen ýaqyty týraly argýmenti qabyldansa, olarǵa «kirshiksiz alaıaqtyq» shemasyn jasap ketýge múmkindik týyp otyr dep alańdaýshylyq bildirgen. «Urlanǵan 150 mln AQSh dollary kólemindegi qarjy Qazaqstanǵa qaıtarylmaýy múmkin», - dedi ol. Bul iste eń basty japa shekken tulǵalar «Qazaqstan qaǵazy» kompanııasyna qarjy quıǵan ınvestorlar men bankter bolyp otyr. Kompanııanyń baspasóz qyzmetiniń málimetinshe, kompanııanyń negizgi kredıtorlary «Alıans Bank» pen «Qazaqstan Damý banki».
