London Shotlandııanyń táýelsizdik jónindegi jańa referendým ótkizý bastamasyn qoldamady
ASTANA. KAZINFORM — Ulybrıtanııa úkimeti Shotlandııa parlamentiniń táýelsizdik týraly qaıta referendým ótkizý jónindegi bastamasyn qoldaýdan bas tartty.
Seısenbi kúni Shotlandııa parlamentiniń depýtattary 72 daýys qarsy 55 daýyspen London bıligine ekinshi referendým uıymdastyrýǵa kelisim berý týraly úndeý joldaýdy maquldady.
Alaıda Ulybrıtanııa úkimetiniń resmı ókili mınıstrler kabıneti Shotlandııanyń Birikken Koroldik quramynan shyǵýyn da, jańa daýys berý ótkizýdi de qoldamaıtynyn málimdedi.
Daýnıng-strıttiń pikirinshe, Shotlandııa bıliginiń negizgi mindeti — ekonomıkany damytý, halyqtyń ál-aýqatyn arttyrý jáne memlekettik qyzmet sapasyn jaqsartý bolýy tıis.
— Halyq bılikten shyn máninde mańyzdy máselelerge — ekonomıkalyq ósimge, ómir súrý deńgeıin kóterýge jáne memlekettik qyzmet sapasyna nazar aýdarýdy kútedi. Kún tártibiniń ózeginde qoǵamdy bóletin bastamalar emes, naqty nátıjeler turýy kerek, — dedi brıtan úkimeti ókilderi.
London tarapy 2014 jylǵy referendým aldynda daýys berý ıdeıasyn Shotlandııa men búkil Ulybrıtanııadaǵy jetekshi saıası kúshter men qoǵamdyq ınstıtýttar qoldaǵanyn eske saldy. Al qazir mundaı ortaq kelisim joq ekeni aıtyldy.
Parlamenttegi talqylaý kezinde Shotlandııanyń birinshi mınıstri ári Shotlandııa ulttyq partııasy jetekshisi Djon Sýınnı óńir turǵyndary ózderiniń saıası bolashaǵyn ózderi sheshýi tıis ekenin aıtty. Onyń sózinshe, Shotlandııanyń Ulybrıtanııamen odaǵy tek erikti negizde ǵana saqtalýy múmkin.
Sýınnı sondaı-aq jańa referendým ótse, halyqtyń basym bóligi táýelsizdikti qoldaıtynyna senim bildirdi.
Shotlandııadaǵy táýelsizdik máselesi sońǵy ýaqytta parlamentte táýelsizdikti jaqtaıtyn kúshterdiń yqpaly kúsheıgennen keıin qaıta kún tártibine shyqty. Buǵan qosa, Ulybrıtanııanyń Eýropalyq Odaq quramynan shyǵýy da pikirtalasty kúsheıtti, sebebi Shotlandııa turǵyndarynyń edáýir bóligi Brexit sheshimin qoldamaǵan bolatyn.
Shotlandııanyń táýelsizdigi týraly alǵashqy referendým 2014 jyly ótken edi. Sol kezde daýys berýshilerdiń shamamen 55 paıyzy óńirdiń Birikken Koroldik quramynda qalýyn qoldaǵan.
Aıta keteıik, táýelsizdik máselesine qatysty pikirtalas Shotlandııa ulttyq partııasy tóńiregindegi janjal aıasynda órship otyr. Partııanyń burynǵy atqarýshy dırektory, eks-premer Nıkola Sterdjenniń burynǵy jubaıy Pıter Mıýrrell partııa qarajatynan 400 myń fýnt sterlıngten astam qarjyny jymqyrǵanyn moıyndady. Tergeý málimetinshe, bul qarajattyń bir bóligi táýelsizdik jónindegi ekinshi referendým ótkizý naýqany úshin jınalǵan. Aqsha qymbat saǵattar, kofe mashınalary jáne avtokólik úıi sekildi sán-saltanat zattaryna jumsalǵan. Al Nıkola Sterdjen burynǵy kúıeýiniń áreketterinen beıhabar bolǵanyn aıtyp, ózin de «adastyrǵanyn» málimdedi.
