London polıtsııasy telefon urlyǵyna qarsy operatsııada 700-den astam adamdy ustady
ASTANA. KAZINFORM – London polıtsııasy uıaly telefon urlyǵyna qarsy júrgizilgen eń iri operatsııalardyń biri barysynda 700-den astam adamdy ustady, dep habarlaıdy Kazinform agenttiginiń Londondaǵy menshikti tilshisi.
Operatsııa 1-30 qyrkúıek aralyǵynda júrgizildi. Polıtsııa qyzmetkerleri 50-den astam tintý júrgizdi. Onyń ishinde urlanǵan qurylǵylardy qabyldap, qaıta satýy múmkin degen kúdikke ilingen paıdalanylǵan telefon dúkenderi de tekserildi.
Qalalyq polıtsııanyń málimetinshe, telefon urlaý jáne olardy ıemdený maqsatyndaǵy tonaýǵa baılanysty qylmystar sany 2024 jylǵy 81 439-dan 2025 jyly 71 867-ge deıin azaıǵan. Bul úrdis bıyl da jalǵasyp otyr. Qańtar-tamyz aılarynda mundaı 39 793 quqyq buzýshylyq tirkelgen. Byltyr osy kezeńde 49 136 qylmys jasalǵan.
Qylmys sany azaıǵanyna qaramastan, Londonda urlanǵan telefondardyń zańsyz naryǵy áli de aýqymdy bolyp otyr. Ulybrıtanııa astanasy ákimdiginiń baǵalaýynsha, onyń jyldyq kólemi shamamen 50 mln fýnt sterlıngti nemese 30 mlrd teńgeni quraıdy.
Bul qylmys túrimen kúrestiń bir tetigi retinde Ulybrıtanııa polıtsııasy men Apple korporatsııasy arasynda urlanǵan qurylǵylar týraly aqparat almasý eki jyldan beri jalǵasyp keledi. Bul quqyq qorǵaý organdaryna urlanǵan telefondardy Ulybrıtanııa aýmaǵynda da, shetelde de baqylaýǵa múmkindik beredi.
Máseleniń aýqymy el shekarasynan da asyp otyr. Operatsııa ótken jumada Ulybrıtanııadaǵy eń iri uıaly telefon kontrabandasy jelisiniń úsh qatysýshysyna úkim shyǵarylýymen tuspa-tus keldi.
Tergeý málimetinshe, qylmyskerler 2024-2025 jyldary Ulybrıtanııadan Qytaıǵa 40 myńǵa deıin urlanǵan uıaly telefondy shyǵarýdy uıymdastyrǵan. Polıtsııa bul jeli atalǵan kezeńde Londonda urlanǵan barlyq telefondardyń shamamen 40%-yna qatysy bar dep sanaıdy. Úsh qatysýshyǵa taǵaıyndalǵan jalpy jaza merzimi 25 jyl bas bostandyǵynan aıyrýdy qurady.
Sonymen qatar qylmyskerler qurylǵylardy qorǵaý júıesiniń kúsheıtilýine beıimdelip jatyr. Aldyn ala málimetterge sáıkes, qaýipsizdik tehnologııalary jetildirilgen saıyn olar telefondardy buzý úshin «áleýmettik ınjenerııa» dep atalatyn jańa ádisterge jıi júginetin bolǵan.
Zııankester qoldanýshylar senim bildiretin uıymdardyń ókilderi retinde tanystyrady. Olar qurbandarmen basqa qurylǵylar arqyly baılanysyp, telefondardy buǵattan shyǵarýǵa qajetti parolder men eseptik jazba derekterin alýǵa tyrysady.
Buǵan deıin Qazaqstan men Ulybrıtanııa odan arǵy yntymaqtastyqqa ashyqtyqty rastady.
