Brıýsselde Qazaqstan men EO arasyndaǵy strategııalyq áriptestikti damytý máseleleri talqylandy
ASTANA. KAZINFORM – Brıýsselde Berlın Eýrazııalyq klýbynyń (BEK) 47-otyrysy ótip, onda Eýropalyq odaqtyń Global Gateway jahandyq ınvestıtsııalyq strategııasyn iske asyrý arqyly Qazaqstan men Eýropalyq odaq arasyndaǵy strategııalyq áriptestikti tereńdetý máseleleri talqylandy, dep habarlaıdy Kazinform agenttiginiń menshikti tilshisi.
2012 jyly qurylǵan Berlın Eýrazııalyq klýby ózekti máseleler boıynsha ashyq pikir almasýǵa arnalǵan tıimdi ári eksklıýzıvti alań sanalady. Klýb nemis, eýropalyq jáne qazaqstandyq saıasatkerlerge, sarapshylarǵa jáne bıznes ókilderine Qazaqstandaǵy oqıǵalardy, sondaı-aq Germanııa jáne Eýropalyq odaqpen saıası-ekonomıkalyq baılanystardy talqylaýǵa múmkindik beredi.
Dıalog alańyna Eýropalyq ınstıtýttardyń, Qazaqstan Respýblıkasynyń memlekettik organdarynyń ókilderi, dıplomatııalyq korpýs músheleri, sondaı-aq Eýropa men Qazaqstannyń jetekshi kompanııalarynyń basshylary qatysty.
Jıyndy ashqan Qazaqstannyń Belgııadaǵy elshisi Roman Vasılenko Astana men Brıýssel arasyndaǵy saıası qatynastar týraly aqparat berdi.
Germanııa ekonomıkasynyń Shyǵys komıtetiniń atqarýshy dırektory Makael Harms qazirgi otyrys Qazaqstan Prezıdenti Qasym-Jomart Toqaevtyń Berlınge saparynan keıin ótip otyrǵanyn atap ótti. Onyń aıtýynsha, sapar ekonomıkalyq turǵydan mańyzdy nátıjeler berdi. Atap aıtqanda, 30-dan astam qujatqa qol qoıylyp, jalpy somasy 2 mlrd AQSh dollarynan asatyn iskerlik kelisimder jasalǵan.
Brıýsseldegi talqylaýdyń negizgi taqyryby Global Gateway Investment Hub aıasynda qarjylandyrý tetikterin is júzinde iske asyrý jáne jeke kapıtaldy tartý máseleleri boldy.
Sarapshylar men naryq ókilderi kólik-logıstıkalyq ınfraqurylymdy damytýǵa jáne turaqty ekonomıkalyq ósýdi qamtamasyz etýge baǵyttalǵan birlesken jobalardy qoldaýdyń naqty quraldaryn qarastyrdy.
Taraptar Ortalyq Azııany Eýropamen baılanystyratyn saýda jáne tranzıttik dálizderdi damytýǵa erekshe nazar aýdardy. Bul rette Transkaspıı halyqaralyq kólik baǵytynyń (Orta dáliz) áleýetine basymdyq berildi.
Otyrystyń jeke sessııasynda strategııalyq mańyzy bar shıkizat (CRMs), jańartylatyn energetıka jáne «jasyl» sýtegi salalaryndaǵy yntymaqtastyq máseleleri talqylandy. Bul baǵyttar óndiristik jáne energetıkalyq tizbekterdi ózara yqpaldastyrýǵa baǵyttalǵanyn kórsetti.
Brıýsseldegi sarapshylar Qazaqstannyń jańa saıası dáýirin talqylady.
