London, Parıj, Rım, Vena: elordadan Eýropa elderine tikeleı áýe reısteri ashylady
ASTANA. KAZINFORM — Búgin Úkimet otyrysynda Premer-mınıstr Oljas Bektenov osy jyldyń sońyna deıin elordadan Tokıo men Nıý-Iorkke tikeleı áýe reısin ashýdy tapsyrdy.
— Memleket basshysy bizdiń aldymyzǵa Qazaqstandy óńirdegi jetekshi avıatsııalyq habqa aınaldyrý týraly strategııalyq mindet qoıdy. Atalǵan maqsatqa jetý úshin qoldanystaǵy áýejaı ınfraqurylymyn jańǵyrtý, otandyq jáne halyqaralyq áýe kompanııalaryna qolaıly jaǵdaı jasaý baǵytynda aýqymdy jumys istelip jatyr. Áýe kemeleriniń parki men tasymaldaý geografııasy keńeıip keledi. Tsıfrlyq sheshimder, sonyń ishinde jasandy ıntellekt tehnologııalary belsendi túrde engizilip jatyr. Kólik mınıstrligi qajetti ınfraqurylymdy, servıs pen tehnıkany únemi jańartyp, naryq pen tehnologııalarǵa árdaıym taldaý júrgizip otyrýǵa tıis, — dedi Oljas Bektenov.
Onyń aıtýynsha, Halyqaralyq azamattyq avıatsııa uıymynyń (ICAO) strategııalyq josparyna sáıkes, 2050-shi jylǵa qaraı jolaýshylar sany jylyna 12 mıllıardtan asady, al kommertsııalyq ushaqtardyń álemdik parki 2034-shi jylǵa qaraı eki esege artady.
— Mundaı jaǵdaıda biz álemdik avıatsııanyń jahandyq júıesine ene otyryp, óz ornymyzdy ıelenýimiz kerek. Jańa halyqaralyq baǵyttardy, atap aıtqanda Eýropalyq odaq elderi men AQSh-qa reıster ashý jumysyn jedeldetý qajet. Bul rette, bılet baǵasy básekege qabiletti bolýǵa tıis. Ásirese, Astanadan ushatyn halyqaralyq áýe baǵyttaryna erekshe nazar aýdarǵan jón. Osyǵan oraı Kólik mınıstrligine Air Astana kompanııasymen birge osy jyldyń sońyna deıin elordamyzdan Tokıo men Nıý-Iorkke, al 2027-shi jyly — Astanadan London, Parıj, Rım, Vena sııaqty Eýropa elderiniń astanalary men basqa da qalalaryna tikeleı áýe qatynastaryn ashýdy tapsyramyn. Investorlar men týrısterdi tartamyz desek, bul — óte mańyzdy másele, — dedi Úkimet basshysy.
Buǵan deıin Tokıo, Sıngapýr, Nıý-Iorkke Qazaqstannan áýe reısteri ashylatynyn jazǵan edik.
