London oıyndarynda kók baıraqty Nurmahan Tinálıev ustap shyqpaq
ASTANA. 22 mamyr. QazAqparat - 27 shilde men 12 tamyz aralyǵynda Londonda ótetin HHH jazǵy Olımpıada oıyndarynyń ashylý saltanatynda qazaqtyń kók baıraǵyn áıgili balýan Nurmahan Tinálıev ustap shyǵady.
Bul týraly «Aıqyn» gazeti 22 mamyr kúngi sanynda jazdy.
«Ondaı qurmetke Nurmahan laıyq. Grek-rım kúresi boıynsha ol búgingi tańdaǵy beldi balýandardyń biri. Asa aýyr salmaqta kúsh synasyp júrgen qazaqtyń qaısar uly 2010 jáne 2011 jylǵy álem chempıonatynda qol medaldi moınyna ildi. Osydan eki jyl buryn Gýanjoýda ótken Azııa oıyndarynda altyn tuǵyrǵa tabany tıdi. Tinálıev qandaı jarysqa qatyssa da únemi el senimin aqtap júr. Sol sebepti de nar tulǵaly jigitimizge osyndaı mańyzdy mıssııa senip tapsyryldy», - delingen maqalada.
Balýannyń ózi BAQ ókilderine bergen suhbatynda «Men úshin bul úlken jaýapkershilik. Ermahan aǵam sııaqty elge altyn medal syılaýǵa bar kúsh-jigerimdi salamyn», - dep aǵynan jaryldy.
Esterińizge sala keteıik, dańqty boksshymyz 2000 jylǵy Sıdneı Olımpıadasynyń ashylý rásiminde memlekettik týymyzdy ustap shyǵyp, aqyrynda chempıondyq ataqqa qol jetkizgen bolatyn.
Basylymnyń jazýynsha, bul aqparatty Sport jáne dene shynyqtyrý isteri agenttigi áli rastaǵan joq. Desek te, osy mańyzdy is Nurmahan Tinálıevke senip tapsyrylatynyna kúmán joq.
