London Olımpıadasynyń júldegeri Marına Volnova jerlesterimen kezdesti
QAZALY. QazAqparat - London Olımpıadasynyń qola júldegeri Marına Volnova jerlesterimen júzdesti, dep habaraıdy QazAqparat tilshisi.
Bul sharany Qyzylorda oblystyq jastar saıasaty basqaramasynyń qoldaýymen aımaqtyq «Rýhanı jańǵyrý» ortalyǵy uıymdastyrdy.
Týǵan topyraǵyna tabany tıgen ataqty sportshy áýeli aýdandyq sport keshenine baryp, jas boksshylarmen júzdesti. Jigerlendiretin jalyndy sózderin arnap, ashyq pikir alysty. Odan soń aýdandyq mádenıet úıine kelip, jankúıerlerimen, ustazdarymen, synyptastarymen jáne alǵash boks qolbaǵyn kıgizgen bapkerimen kezdesti.
Kezdesý barysynda Olımpıada oıyndarynyń júldegeri Marına Volnova sporttaǵy júrip ótken joldaryn, jetistikke jetýdiń qyr-syryn aıtty.
Odan bólek sportshy balalardyń orny, jetistikke jetken sheber sportshy ǵana emes, otbasy uıytqysyna aınalǵan adal jar, qamqor ana atanýdyń qupııalarymen bólisti. Ustazdary ystyq lebizderin bildirip, sportshynyń balalyq shaǵynan estelikter aıtty.
«Týǵan jerimmen saǵyna qaýyshyp otyrmyn. Tórt jyl bala kútimimen demalysta boldym. Endi jattyǵýlarǵa kirisip, babyma kelýim kerek», - deıdi Marına Volnova.
Kópshiliktiń suraýy boıynsha erteń sport kesheninde sheberlik saǵaty ótedi. Onda Marına sport álemine endi qadam basqan jas boksshylarmen kezdesip, bilgen-túıgenderin ortaǵa salady.
Aıta keteıik, Marına Volnova Qazalyda alǵashqy sporttyq jattyǵýlaryn bastaǵan. Ol osyndaǵy balalar men jasóspirimder sport mektebinde dzıýdo kúresinen jattyqqan. Marına búginde QR eńbegi sińgen sport sheberi. AQSh-tyń Barbodos qalasynda ótken Álem chempıonatynyń kúmis, Olımpıada júldegeri.
