London olımpıadasynda naqty nátıjege qol jetkizý úshin qajetti mindetter júktelip, mindettemeler bekitildi - mınıstr
ANA. 28 naýryz. QazAqparat /Qanat Mámetqazyuly/ - Elimizdegi árbir jattyqtyrýshy men sportshyǵa London olımpıadasynda naqty nátıjege qol jetkizý úshin qajetti mindetter júktelip, mindettemeler bekitildi.
Bul týraly búgin QR Parlamenti Májilisinde ótken Úkimet saǵatynda Týrızm jáne sport mınıstri Temirhan Dosmuhambetov málim etti.
Óz baıandamasynda aǵymdaǵy 2011 jyly atqarylatyn basty sharalarǵa toqtalǵan mınıstr, bıyl elimizde dene shynyqtyrýdy jáne sportty damytýdyń 2011-2015 jyldarǵa arnalǵan salalyq baǵdarlamasy ázirlenetinin atap ótti. «Bıylǵy eń basty mindet - qazaqstandyq sportshylardy Londondaǵy 30-shy jazǵy Olımpıada oıyndaryna jáne basqa da halyqaralyq jarystarǵa daıyndaý. Eske salsaq, 2008 jyly Beıjiń Olımpıadasynda bizdiń sportshylar 13 medal ıelenip, 205 qatysýshy memleket arasynda 19-orynǵa qol jetkizgen edi. Bul elimizdiń Olımpıadalyq qozǵalysynyń damýynyń bútkil kezeńindegi olımpıadalyq qurama komandanyń eń úzdik kórsetkishi bolyp tabylady. Osyǵan baılanysty biz jattyqtyrýshylar quramynyń, sportshylardyń aldyna 2012 jyly London Olımpıadasyna budan da sátti óner kórsetýdi qamtamasyz etý mindetin júktep otyrmyz. Qazirgi kúni osy maqsat boıynsha ulttyq qurama komandany daıarlaý jospary bekitildi. Negizgi quramaǵa sportshylar iriktelip, olarmen kelisimshartar jasalyp, mańyzdy daıyndyq jumystary atqarylýda. Árbir jattyqtyrýshy men sportshyǵa London olımpıadasynda naqty nátıjege qol jetkizý úshin qajetti mindetter júktelip, mindettemeler bekitildi», - dedi T. Dosmuhambetov.
