London Olımpıadasynda Qazaqstannyń namysyn 15 palýan qorǵaıdy
ASTANA. 7 mamyr. QazAqparat - Ulybrıtanııanyń London qalasynda ótetin XXX Jazǵy Olımpıada oıyndaryna Qazaqstannyń atynan 15 palýan qatysatyn bolady.
Olımpıada joldamalaryn sarapqa salǵan sońǵy týrnır búgin Fınlıandııanyń Helsınkı qalasynda aıaqtaldy. Ókinishke qaraı,grek-rım kúresinde jeti salmaq dárejesi ishinen biz 55 jáne 96 keli boıynsha lızentsııa ala almadyq. Ol dodada Qazaqstannyń palýany Marat Kárishalov (55 keli) birinshi aınalymnan shyǵa almady. Alhazýr Ozdıev (96 keli) te búgin birinshi qarsylasy - lıtvalyq Mındaýgas Ezerkısten utylyp qaldy. Sondaı-aq búgin sharshy alańǵa shyqqan Aıym Ábildına (55 keli) da óz qarsylasynan aılasyn asyra almaı, 0:2 esebimen jeńildi. Oǵan moldovalyq Lıýdmıle Krıstı qarsy shyqqan bolatyn.
Jalpy, London Olımpıadasynda Qazaqstannyń namysyn 15 palýan qorǵaıdy. Olardyń ishinde grek-rım kúresinen - 5, erkin kúresten 7 jáne áıelder kúresi boıynsha qatysatyn 3 palýan bar.
