London Olımpıadasynyń júldegerine bılik ókilderine kúsh qoldandy degen aıyp taǵyldy

PAVLODAR. KAZINFORM - Oǵan bılik ókilderine kúsh qoldandy degen aıyp taǵylyp otyr. Kinási dáleldense, 3 jyldan 7 jylǵa deıin bas bostandyǵyn shekteý nemese aıyrý jazasy qoldanylýy múmkin.

Pavlodar oblysynda erkin kúresten Olımpıada oıyndarynyń qola júldegeri Dáýlet Shabanbaıǵa qatysty qylmystyq is sotta qaralady. Tanymal sportshyǵa bılik ókilderine kúsh qoldandy degen aıyp taǵylyp otyr.

«Sot kabıneti» jarııalaǵan materıaldarǵa súıensek, Dáýlet Shabanbaıǵa QR Qylmystyq kodeksiniń 380-baby 4-bóligi 1-tarmaǵy boıynsha aıyp taǵylǵan. Bul bap – eki nemese odan da kóp bılik ókiline kúsh qoldaný deregine qatysty.

Qazir ol oblys ortalyǵyndaǵy tergeý ızolıatorynda otyr. Sot sportshynyń isin Pavlodar qalasyndaǵy qylmystyq ister jónindegi aýdanaralyq sotqa berip, basty tyńdaýǵa qatystyrý týraly sheshim shyǵardy. Atalǵan bap boıynsha 3 jyldan 7 jylǵa deıin bas bostandyǵyn shekteý nemese aıyrý jazasy qarastyrylǵan.

42 jastaǵy Dáýlet Shabanbaı — 2012 jylǵy London Olımpıadasynyń qola júldegeri (medaldi 2022 jyly eki qarsylasy dopıngpen ustalǵannan keıin alǵan), Azııa chempıonattarynyń tórt dúrkin qola jáne kúmis júldegeri, 2014 jylǵy Azııa oıyndarynyń kúmis júldegeri.

Óńirlik dene shynyqtyrý jáne sport basqarmasynyń dereginshe, Dáýlet Shabanbaı sporttyq mansabyn 2019 jyly aıaqtaǵan. 

Eske sala keteıik, Almatyda sot Qojamjarovtar otbasynyń múlkin buǵattady.