London Naýryzdy toılap jatyr: mádenıet, mýzyka jáne halyq qolóneri festıvali
ASTANA. KAZINFORM — Festıval qonaqtaryna brıtandyq qoǵamdy Naýryzdy toılaıtyn halyqtardyń mádenı murasymen tanystyrǵan alýan túrli baǵdarlama usynyldy, dep habarlaıdy Kazinform agenttiginiń menshikti tilshisi.
Naýryz merekesi Londondaǵy Ýnıversıtettik kolledj aýmaǵynda «Ortalyq Azııa kóktemi» festıvali aıasynda ótti. Іs-sharaǵa dıaspora ókilderi, stýdentter, turǵyndar jáne Ulybrıtanııa astanasynyń qonaqtary jınaldy.
Festıvaldi Naýryz merekesi dástúrli túrde toılanatyn elderdiń stýdenttik qaýymdastyqtary uıymdastyrdy. Alǵashqy saǵattardan bastap munda mýzyka, áńgime jáne ulttyq taǵamdardyń hosh ıisi ańqyǵan jarqyn merekelik atmosfera ornady.
— Naýryz bizdi mádenıet, mýzyka jáne dastarhannyń jomarttyǵy arqyly biriktirip, ár ultqa óz janynyń bir bóligin bólisýge múmkindik berip otyr, — dep atap ótti festıvaldiń negizgi uıymdastyrýshysy Londondaǵy Ýnıversıtettik kolledji Qazaq stýdentteri qoǵamynyń jetekshisi Edige Erqasynov.
Ulttyq taǵamdar men qolóner buıymdarynyń baı kórmesi ótken Ortalyq Azııa jármeńkesi bul kúnniń erekshe oqıǵasyna aınaldy. Qonaqtar palaý, manty, baýyrsaq jáne qýyrdaq sııaqty dástúrli taǵamdardy kórip qana qoımaı, onyń dámin de tata aldy.
Festıval aıasynda sonymen qatar sheberlik jáne prezentatsııalyq stendter usynylyp, onda kelýshiler ulttyq naqyshtaǵy zergerlik buıymdar, jarqyn dástúrli kostıýmder, kıizden jáne bylǵarydan jasalǵan buıymdar, sáýkele (dástúrli qazaq halyq kıimi), taqııalar jáne qoldan jasalǵan túrli kádesyılardy tamashalaı aldy.
— Bul festıval Naýryzdy toılaýdy ǵana emes, sonymen qatar mádenı baılanystardy nyǵaıtýǵa, halyqaralyq aýdıtorııany aımaqtyń dástúrlerimen tanystyrýǵa jáne mádenıetter arasyndaǵy dıalog úshin keńistik jasaýǵa baǵyttalǵan, — dep atap ótti London Kazakh Centre qoǵamdyq bastamasynyń dırektory Qýat Serikov.
London Kazakh Centre — Ulybrıtanııada turatyn qazaqstandyqtardy biriktirýge baǵyttalǵan qoǵamdyq bastama. Onyń negizin qalaýshylar stýdentter, jas mamandar jáne otbasylardy biriktiretin ashyq qoǵamdastyq qurýǵa umtylyp otyr.
Kelýshiler Ortalyq Azııa halyqtarynyń ádet-ǵuryptarymen jaqynyraq tanysa alatyn ınteraktıvti aımaq ortalyq keńistikterdiń biri boldy. Munda kelýshiler 3D-basyp shyǵarý arqyly arnaıy jasalǵan oıyn bólikterin paıdalanyp, dástúrli asyq atý oıynyna qatysýǵa bolady.
Bas sahnada kontserttik baǵdarlama ótti. Kórermender aldynda dombyra, qobyz jáne ázerbaıjan sazy sııaqty dástúrli aspaptarda oınaıtyn mýzykanttar, ulttyq bılerdi oryndaǵan bı toptary óner kórsetti, al spıkerler aımaqtyń mádenıeti men tarıhy týraly baıandady.
Mońǵolııadaǵy qazaqtar Naýryz meıramyn qalaı toılaıtynyn myna materıaldan oqı alasyz.
