London metrosynda jarylys boldy
ASTANA. QazAqparat - London metrosynyń Tower Hill stansasynda kishigirim jarylys boldy. Bul jaıly 26 qyrkúıek, seısenbi kúni Sputnik International habarlady. Málim bolǵandaı, jolaýshylardyń biriniń sómkesindegi uıaly telefondy qýattaýǵa arnalǵan qurylǵy qyzyp ketken. Aınalada bolǵan adamdar arasynan qatty zardap shekkender joq, alaıda jolaýshylar dúrbeleńge túsken.
Polıtsııa metro jolaýshylaryn stansadan qaýipsiz aımaqqa kóshirý týraly sheshim qabyldaǵan. Biraq quqyq qorǵaý organdary bolǵan oqıǵa lańkestik akti retinde qarastyrylyp otyrmaǵanyn málim etti.
Eske salsaq, 15 qyrkúıek kúni Londonnyń batysynda ornalasqan Parsons Green metro stansasynda jarylys boldy. Oqıǵaǵa kýá bolǵandardyń aıtýynsha, bomba poıyz vagonynda qaldyrylyp ketken pakettegi shelek ishinde bolǵan. Jarylys saldarynan 22 adam dene jáne kúıik jaraqattaryn aldy. Brıtan bıligi oqıǵany lańkestik akti dep atady. Shabýyl úshin jaýapkershilikti DAISh lańkestik toby (Qazaqstan men ózge elder aýmaǵynda tyıym salynǵan) óz moınyna aldy.
