London meri bir áıeldi buzaqylar shabýylynan qorǵap qaldy
ASTANA. Qarashanyń 4-i. QazAqparat - London meri Borıs Djonson kóshede buzaqylardyń shabýylyna ushyraǵan bir áıeldi qutqaryp qaldy,
dep habarlaıdy brıtandyq VVS telekompanııasy.
Keshe keshkisin velosıpedpen úıine qaıtyp kele jatqan Djonson myrza Londonnyń soltústigindegi Kemden aýdanynda bir oqıǵanyń kýágeri boldy. Bir top jasóspirim qyzdar, bireýiniń qolynda temir soıyl bar, jergilikti turǵyn áıel Frennı Armstrongty qorshap alady. Jurttyń nazaryn ózine aýdaryp, kómek suraǵan áıeldiń aıqaıyn dál osy sátte jaqyn mańda ketip bara jatqan London meri estıdi. Ol aıqaılap, buzaqylardy shoshytady da, soıyldaryn tastaı qashqan olardyń sońynan velosıpedpen qýady. Birneshe mınýttan keıin oqıǵa ornyna qaıtyp kelip, áıeldi úıine deıin shyǵaryp salady.
«Ol meni qutqaryp qaldy», deıdi Armstrong hanym. Qazirgi konservator merdiń jankúıeri emes ekenin moıyndaǵan Armstrong hanym, ótken saılaýda onyń qarsylasy Ken Lıvıngstonǵa daýys bergenin aıtyp otyr.
«Biraq basyńa is túskende, Ken Lıvıngstonnan góri, Borıs Djonson paıdalyraq eken»,- dep ázildeıdi Armstrong hanym.
Djonsonnyń baspasóz hatshysy osyndaı oqıǵa bolǵanyn rastady, biraq qala basshysynyń basqa kommentarııden bas tartqanyn málim etti.
