London marafonynda bir jarysta úsh sportshy álem rekordyn jańartty
ASTANA. KAZINFORM – London marafonynda birden úsh sportshy bir jarysta sońǵy tirkelgen álem rekordynan asyp túsken nátıje kórsetip, tarıhı jetistikke qol jetkizdi, dep habarlaıdy BBC agenttigi.
Jarys jeńimpazy kenııalyq Sebastıan Save boldy. Ol marafon qashyqtyǵyn 1 saǵat 59 mınýt 30 sekýndta júgirip ótip, tarıhta resmı túrde eki saǵattan az ýaqytta marafondy aıaqtaǵan alǵashqy adam atandy.
Ekinshi oryndy marafon qashyqtyǵynda alǵash ret baq synaǵan efıopııalyq Iomıf Kedjelcha ıelendi – 1:59.41. Úshinshi bolyp jartylaı marafon boıynsha álem rekordynyń ıegeri, ýgandalyq Djeıkob Kıplımo máre syzyǵyn 2:00.28 nátıjesimen kesti.
Úsheýi de 2023 jyly Chıkago marafonynda kenııalyq Kelvın Kıptým ornatqan 2:00.35 álemdik rekordynan ozyp tústi. Save bul nátıjeni bir mınýttan astam ýaqytqa jaqsartty.
Jeńimpaz sheshýshi serpilisti márege 10 shaqyrym qalǵanda jasady. Uıymdastyrýshylardyń málimetinshe, jarystyń alǵashqy jartysynda-aq Save álem rekordynyń kestesimen kele jatqan jáne ony 1:00.29 ýaqytta baǵyndyrǵan. Qashyqtyqtyń ekinshi bóliginde ol qarqynyn odan ári údetti.
– Ózimdi keremet sezinip turmyn. Bul – ómir boıy este qalatyn kún. Máre syzyǵyn kesip ótip, ýaqytty kórgende qatty qýandym, – dedi Save BBC-ge bergen suhbatynda.
Kenııalyq sportshynyń jeńisi tosyn jaǵdaı bolǵan joq. Ol buǵan deıin ótken jyly London marafonynda, al 2024 jyly Berlın marafonynda jeńiske jetken. Jarys qarsańynda ol BBC Sport-qa jańa álem rekordyn ornatý ýaqyt enshisindegi másele ekenin aıtqan edi.
Aıta keteıik, jýyrda gýmanoıd robot jartylaı marafonnan erler arasyndaǵy rekordty jańartty.
