London qazaqtary Bıg-Ben aldyna kúı tartty
Erkin Bekbaev – Qazaqstanda dúnıege kelip, Ulybrıtanııada ósken otandasymyz. 16 jasynda bilim qýyp, Tumandy Albıonǵa ketken ol tildik ortanyń joqtyǵynan qazaqshany sál umytyńqyrap qalǵan. Biraq atasy úıretken dombyra tartý ónerin esten shyǵarmaǵan. Sharalarǵa únemi aspabyn ózimen birge alyp júretin Erkin bul joly da dástúrinen jańylmady.
«Men búgin «Adaı», «Ata tolǵaý» kúılerin oryndadym. Sondaı-aq «Qara jorǵa», «Dombyra» ánderin de aıttym. Jahandaný dáýrinde, shetelde ósken qazaq balalary úshin kim ekenińdi umytyp qalý qaýpi óte joǵary. Dombyra maǵan tól mádenıetimdi esten shyǵarmaýǵa mol múmkindik beredi», - dedi Erkin Bekbaev.
Sharanyń uıymdastyrýshysy Qazaqstannyń Ulybrıtanııadaǵy elshiligi. Maqsat – dombyra kúnine oraı Londonda jumys nemese oqý babymen ýaqytsha turyp jatqan otandastyrymyzdyń basyn biriktirip, sheteldikterge ulttyq ónerimiz ben mádenıetimizdi pash etý. Fleshmobqa kórshi qalalardan kelgen qazaq stýdentteri de qatysty.
«Sonaý Koventrıden, eki saǵattyq jerden tańǵy altyda turyp, osy jerge keldik. Dombyramyzdyń únin estirtip jatqanymyz óte-óte jaqsy. Solaı bizdi tanı bastaıdy, elimizdiń aty shyǵady», - deıdi «Bolashaq» baǵdarlamasymen doktorantýrada oqyp jatqan stýdent Ásem Aımaǵanova.
Bıg-Ben janynda júrgen sheteldik týrısterdiń ulttyq aspabymyzǵa degen qyzyǵýshylyǵy óte joǵary boldy. AQSh, Avstrııa, Úndistan azamattary áýelegen ásem ánderdi uıyp tyńdap, tańdanystaryn jasyrmady. Ulttyq kıim kıgen jastarmen fotoǵa túsip, dombyra týraly aqparat aldy. Keıbiri, tipti, mýzykalyq aspapta oınap ta kórdi.
«Qyzym mýzyka jaqsy kóredi. Aspaptyń daýysyn estip, uıyp tyńdaı jóneldi. Biz de dombyranyń ásem únine tánti boldyq. Qos ishekten ǵana tursa da áýezdi úni keremet áserge bóleıdi eken», - deıdi Avstrııa azamaty Djýdas Ýolter.
«Men buryn geografııany jaqsy kóretinmin. Ol meniń hobbıim boldy. Qazaqstan Ortalyq Azııada ornalasqan el ekenin bilemin. Reseı, Ózbekstan, Qyrǵyzstanmen shekaralasady. Sizderde jylqy ósirý mádenıeti jaqsy damyǵan», - deıdi AQSh azamaty Keısı Djeıms.
Aldaǵy ýaqytta Abaı Qunanbaıuly kózi tirisinde paıdalanǵan dombyrasynyń kóshirmesin Brıtan murajaıyna tabystaý josparda bar. Qazirgi ýaqytta daıyndyq jumystary júrip jatyr. Jýyq arada uly aqynnyń ǵıbratty ǵumyry men shynaıy shyǵarmashylyǵynan habardar álem halqy endi oǵan tıesili qundy jádigerdi de tamashalaı alatyn bolady.
