London ıslam qarjysynyń ortalyǵyna aınalýy tıis
ASTANA. 31 qazan. QazAqparat - Búkil álemdik ıslam ekonomıkasyna qatysty 9-shy forýmda Ulybrıtanııanyń premer-mınıstri Devıd Kemeron osyndaı málimdeme jasady.
Ol sheteldik, sonyń ishinde, musylman elderi ınvestıtsııasynyń Ulybrıtanııa ekonomıkasyna tıgizer paıdasyn tilge tıek etti.
"London ıslam qarjysynyń asa iri ortalyǵyna aınalyp úlgerdi. Alaıda, biz buǵan toqmeıilsip qalmaýymyz kerek. London batys elderindegi ıslam qarjysynyń asa iri astanasyna aınalyp qana qoımaı, búgingi tańda álem boıynsha ıslam qarjysynyń «qazanyn qaınatqan» Dýbaımen nemese Kýala-Lýmpýrmen qatar turýy tıis»,- dedi ol.
«Islam qarjysynyń ósý qarqyny dástúrli bank qyzmetinen 50 paıyzǵa artyq. Álemdik ıslam ınvestıtsııasy 2014 jylǵa qaraı 1,3 trln dollardan asýy kerek. Sol sebepti, osy ınvestıtsııanyń edáýir bóligi Ulybrıtanııaǵa da tıesili bolýy kerek»,- dedi ol málimdemesinde.
Onyń aıtýynsha, aldaǵy ýaqytta Ulybrıtanııa sharıǵat talaptaryna saı táýelsiz qundy qaǵazdardy musylman emes elder boıynsha birinshi bolyp shyǵarady. Osynaý qundy qaǵazdardyń alǵashqy transh mólsheri 200 mln fýntty (320 mln dollardy) quraıdy. Brıtan bıliginiń pikirinshe, bul qundy qaǵazdar Ulybrıtanııada ıslam qarjysynyń artýyna septigin tıgizbek.
Sondaı-aq, ol qyzmeti musylmandardyń talǵamy men talabyna saı keletin kompanııalar aktsııasy qamtylatyn arnaıy ındeksti engizý týraly London qor bırjasynyń dúısenbidegi sheshimin quptaıtynyn jetkizdi. Atalmysh ındekstiń óz qarjysyn sharıǵat talaptaryna saı salatyn ınvestorlarǵa baǵdar bolatynyn aıta ketý kerek. Bul týraly muslim.kz habarlady.
