LONDON-2012: Sársekbaevtyń bapkeri taǵy bir bolashaq chempıonyn tárbıelep shyqty ma?!

Dúbirli dodada elimizdiń namysyn 60 kg salmaq dárejesinde jalǵyz ǵana Saıda Hasenova qorǵaıdy. Sharshy alańda atoı salyp, erlerge tán qaısarlyǵymen tanylyp júrgen qazaq qyzy endi tórtjyldyqtyń basty básekesinde laıyqty óner kórsetý úshin kún-tún demeı jattyǵýda. 25 jasar almatylyq boksshy qyz - halyqaralyq sanattaǵy sport sheberi, Qazaqstannyń birneshe dúrkin chempıony, Azııa chempıony, Azııa oıyndarynyń júldegeri. Búginde S. Hasenova «Beıjiń-2008» Olımpıadasynyń chempıony - Baqyt Sársekbaevtiń jeke bapkeri - Kárim Mahmudovtyń qol astynda jattyǵýda.

QazAqparat agenttiginiń tilshisi bapker Kárim Rahmanulymen habarlasyp, Saıda jaıynda suhbat qurǵan bolatyn.   

K. Mahmudovtyń aıtýynsha, Saıda onyń baptaýynda jastaıynan beri jattyǵýda.  

«Saıda - óte jigerli, qaıraty mol qaısar qyz. Onyń Olımpıada oıyndarynda jasyndaı jarqyldasam degen úkili úmiti bar. Ol meniń  jetekshiligimmen Qazaqstannyń alty dúrkin chempıony atandy. El birinshiligine 8 jyl qatysqan ol, alǵashqy eki jarysynda 2-oryndarǵa ıe bolyp júrdi. Odan keıin tek altyn alyp otyrdy. Ol alǵashqy Qazaqstan chempıondyǵyn 70 kg deıingi salmaq dárejesinde aldy. Sosyn 66 kg salmaqta óner kórsetti. Budan keıin taǵy salmaq tastap, 64 kg salmaqta elimizdiń úsh dúrkin chempıony boldy. Biraq áıelder boksy tek úsh olımpıadalyq salmaqta: 51, 60 jáne 75 kg ótedi dep jarııalandy. Soǵan baılanysty Saıda taǵyda «salmaq qýyp» 60 kg jetti. Osy qajyrlylyǵymen ol óziniń bar tilegi Olımpıada oıyndary kezinde sharshy alańnan kóriný ekendigin dáleldedi. Sodan beri ol 60 kg salmaq dárejesinde qatysa júrip, eki ret Qazaqstan chempıondyǵyn jeńip aldy. 2010 jyly Saıdany Azııa oıyndaryna qatystyrdyq. Onda sportshymyz 64 kg salmaqqa deıingi dárejede 3-oryn ıelendi. Bıyl Azııa birinshiligin utyp, London-2012 lıtsenzııasyn qorjynǵa salyp otyr», - deıdi bapker.

Onyń aıtýynsha, qazaqtyń boksshy qyzy aldyna qoıǵan maqsatynan tanbaıtyn, rýhy berik adam. 

«Men Saıdanyń erik-jigerin, tózimdiligin erekshe atap óter edim. Shydamdylyq tanytý ońaı emes. Salmaq qýyp, keıin chempıon ataný - kez kelgen sportshynyń qolynan kele bermeıtin is. Boksshylarda eki alaman bar: onyń biri - salmaqpen kúres, ekinshisi - qarsylaspen kúres. Saıdaǵa bapkerler tarapynan úlken úmit artyldy. Ol biz qoıǵan mindetti abyroımen atqaryp, London Olımpıadasynyń joldamasyn utty. Endigi mindet - Olımpıada medali. Kezinde men Baqyt Sársekbaevqa da birinshi Olımpıadaǵa joldama alý, sosyn Álem chempıony ataǵyn jeńip alý mindetin qoıǵan bolatynmyn. Birinishi mindetti ol oryndady, ekinshisin Olımpıadada júzege asyrdy», - deıdi K. Mahmudov.   

Londonda Saıdanyń salmaǵynda 12 boksshy óner kórsetpek. Onyń 6-ýy álemge óz myqtylyqtaryn dáleldep úlgergen dúldúlder. Olardyń qatarynda álemniń bes dúrkin chempıony ırlandııalyq, eki dúrkin álem  chempıony reseılik boksshy men álemniń úsh dúrkin jeńimpazy brazılııalyq sportshy bar.  

Soǵan baılanysty jerlesimiz elimizdegi jattyǵý alańdarynda sheberligin qaırap júr. Qarsylastarynyń urys júrgizý tásilderin de beınetaspadan qarap, sharshydaǵy básekelesterin baǵamdaýda.

«Olımpıadaǵa deıin Saıda tek jattyǵý ótkizedi. Eshqandaı dodalarǵa qatyspaıdy. Olımpıada bastalýyna eki aı ǵana qaldy. Oǵan tynyǵyp, óz áleýetin jaqsartyp alý qajet. Jalpy, bokstyń erejeleri uldarǵa da, qyzdarǵa da ortaq. Degenmen, qyzdardy jattyqtyrýdyń azdap qıynshylyǵy men ereksheligi bar», - dep atap ótti bapker.

Áńgime barysynda, S. Hasenovanyń sharshy alańdaǵy máneri Olımpıada chempıony B. Sársekbaevtikine uqsaı ma degen saýal qoıdyq. Jattyqtyrýshy jaýabyn kóp kúttirgen joq: «Árıne uqsaıdy! Bapkeri bir ǵoı!», - dedi kúlip...  Bapkerdiń bul jaýaby kóńildegi úmit otyn odan da qatty laýlata tústi.

London Olımpıadasynyń alaýy janatyn kún de jaqyndap qaldy. Buryn jýan judyryqty jigitterimiz qazaqtyń úkilegen basty úmitteri bolatyn. Qazaqstan boksshylary Olımpıada oıyndarynan altynsyz oralǵan emes. Endi budan bylaı boks dese, ishken asyn jerge qoıatyn halqymyz sharshy alańda shıyrshyq atqan qazaq qyzdaryn joǵary tuǵyrlardan kóretindigine senimdi bolaıyq!