Lombardtarǵa qosymsha shekteýler engizilmeıdi
ASTANA. KAZINFORM — Qarjy naryǵyn retteý jáne damytý agenttigi elimizdegi lombardtar qyzmetine talapty kúsheıtýdi josparlap otyrǵan joq. Bul jóninde agenttik tóraǵasynyń orynbasary Oljas Qızatov málimdedi.
— Lombardtarǵa qatysty zańnama men talaptardy qatańdatý jóninde eshqandaı jumys qarastyrylyp jatqan joq, – dedi ol Senat kýlýarynda.
Sonymen qatar, Oljas Qızatov bankter men shaǵyn qarjy uıymdaryna talapty kúsheıtý saldarynan azamattardyń lombardtarǵa aǵylýy artqanyn moıyndady.
Lombardtyq nesıe berýdiń ereksheligi — onda barǵan kisiler qaryz almaıdy, altyn buıymdaryn ótkizip, aqysyna aqshaǵa ıe bolady.
— Bul ósimmen nesıe alýdan anaǵurlym jaqsy, — dedi ol.
Mamannyń sózinshe, bul sektorda da talap qatańdatylsa, onda qarjylyq operatsııalardyń bir bóligi zańsyz naryqqa oıysýy yqtımal. Onda azamattardyń quqyǵy qorǵalmaıdy.
Agenttik málimetinshe, 2025 jyly lombardtardyń portfeli 33%-dan astamǵa ulǵaıyp, 417 mlrd teńgege jetken. Naryq qatysýshylaryna 200 aıyppul salynyp, 18 qadaǵalaý sharasy taǵaıyndalǵan jáne tórt lombard lıtsenzııasynan aıyrylǵan.
Aıta keteıik, buǵan deıin lombardtaǵy qaryz ıpoteka alýǵa kedergi keltiretini nemese keltirmeıtini jóninde jazǵanbyz.
