Lombardtar xalyqty 500-600 protsentpen tonaıdy

QR Joǵarǵy sot sýdıasy Aqyltaı Kasımovtyń aıtýynsha, búginde lombardtar jaýapkershiligi shekteýli seriktestigi bolyp ashylady da, bankter sııaqty nesıe berip otyrady.

«Al olardyń protsentteri 500-600-ge, tipti 900-ge deıin barady deıdi. Ókinishke qaraı, ondaı uıymdardyń qyzmeti zańmen rettelmegen. Halyq nesıeni ne úshin alady? Sebebi aqshasy joq. Al ondaı protsentterge nege kelisedi? Óıtkeni basqa amaly joq. Bankke barsań da sol. Kelisimsharttarda bárin jasyryp qoıady. Aqshany alǵannan keıin qaryzdy ómir baqı tóleýge májbúr bolasyń», - dedi A.Kasımov «Atameken» UKP Sybaılas jemqorlyqqa qarsy kúres jónindegi keńestiń búgingi otyrysynda.

Aıta keteıik, keńestiń búgingi otyrysynda kásipkerler arasyndaǵy kelisimsharttardy oryndaý máselesi qaraldy. Búginde «Atameken» palatasyna túsetin aryzdar ishinde bıznesmender arasyndaǵy daýlarǵa qatysty shaǵymdar az emes. Olar bir-birine aqsha tólemeıdi. Tipti, seriktestik kelisimin rásimdese de, alaıaqtyq jolmen áriptestiń múlkin urlaý faktileri de bar. Qazaqstan kásipkerleriniń quqyqtaryn qorǵaý jónindegi ýákil Bolat Palymbetovtyń sózine qaraǵanda, kásipkerlerdiń kelisimshart mindetterin oryndaı almaýyna memlekettik organdar da kináli. Olar aqshany ýaqytynda bermeıdi. Sodan bıznesmender óz áriptesterine aqshany tóleı almaı júredi.

«Máselen, bıznesmen tenderdi utyp alady. Al memlekettik organ oǵan aqshany tólemeı qoıdy. Sodan búkil tizbek kete beredi. Kásipker óz áriptesine aqsha bere almaıdy. Solaı ary qaraı ketedi», -  deıdi B.Palymbetov.

Osy oraıda «Atameken» UKP basqarma tóraǵasynyń orynbasary Rýstam Júrsinov mańyzdy bir máseleni eske saldy.

«Bizde memlekettik organdardyń birinshi basshysy aýyssa, birden barlyq kelisimsharttar joıylady. Ákim, mınıstr bolsyn, kelisimsharttardy birden buza salady. Óte qyzyqty úrdis...», - deıdi R.Júrsinov. 

Jıynda bankterdiń zańsyz komıssııalary da sóz boldy.