Lombardtar men mıkroqarjy uıymdardyń qyzmeti qalaı retteledi
NUR-SULTAN. QazAqparat - Qazaqstanda kredıtteý sýbektilerine qatysty tıisti retteý jáne qadaǵalaý tetikteri engiziledi. Bul týraly Parlament Májilisinde QR Ulttyq banki tóraǵasynyń orynbasary Oleg Smolıakov málim etti, dep habarlaıdy QazAqparat tilshisi.
Bul baǵyttaǵy qadamdar búgin Májiliste tanystyrylǵan «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý jáne mıkroqarjylyq qyzmet máseleleri boıynsha ózgerister men tolyqtyrýlar engizý týraly» zań jobasy aıasynda iske asyrylmaq.
Zań jobasy aıasynda retteýshilik jáne tutynýshylyq nesıeleý naryǵyndaǵy júıelik problemalardy joıý maqsatynda nesıeleýdiń barlyq sýbektilerine qatysty retteý men qadaǵalaýdy engizý kózdeledi.
«Halyqtyń boryshtyq júktemesiniń úzdiksiz ósýin boldyrmaý maqsatynda barlyq kredıtteý sýbektilerine qatysty tıisti retteý jáne qadaǵalaý quraldaryn engizý talap etiledi», - dedi ol.
Onyń sózine qaraǵanda, búgingi kúni tutynýshylyq qaryz shamamen 5 mln adamda bar. Olardyń jalpy bereshegi 4 trln teńgeden asady. Árbir qaryz alýshynyń bereshegi ortasha alǵanda 800 myń teńgeni quraıdy.
Tutynýshylyq kredıtter portfeliniń neǵurlym belsendi ósýi rettelmeıtin sektorda baıqalady - bul onlaın-kredıtorlar, nesıelik seriktestikter jáne lombardtar. Sonymen qatar, azamattardyń qomaqty nesıe alýy artýda, rettelmeıtin sýbektiler tarapynan qaryz alýshylardyń múddeleri buzylýda.
«Atalǵan problemalardy sheshý úshin qadaǵalaý organynyń retteý aýqymyna nesıeleýdiń barlyq sýbektilerin engize otyryp, ony keńeıtý usynylady. Usynylatyn tásilderde banktik emes kredıttik uıymdardy retteýdiń saralanǵan júıesin engizý kózdeledi», - dedi O. Smolıakov.
Atap aıtqanda, Qazaqstan azamattaryna qaryz berý boıynsha kez kelgen qyzmet jańa qadaǵalaý organynyń tolyq retteý aıasynda bolady.
«Kredıttik seriktestikterdiń, lombardtardyń, mıkroqarjy uıymdarynyń (onyń ishinde onlaın-kredıtorlardyń) nesıelik qyzmeti qoldanystaǵy «Mıkroqarjy uıymdary týraly» Zańnyń negizinde mıkroqarjylyq qyzmet retinde aıqyndalady», - dep atap ótti UB ókili.
O. Smolıakov zań jobasynda atalǵan árbir sýbektiniń jumys istep turǵan bıznes-úlgisin ózgertý kózdelmeıtinin, tek qyzmettiń naqty túrine tán táýekelderge baılanysty talaptar engiziletinin atap ótti.
«Mıkroqarjylyq qyzmetti júzege asyratyn uıymdarǵa qoıylatyn ámbebap talaptarda mıkrokredıtterdi berý qaǵıdalarynyń bolýy, kredıttik bıýroǵa aqparat berý mindettiligi, KJ/TQQ salasyndaǵy talaptardy saqtaý mindettiligi qamtylady», - dedi ol.
Budan buryn habarlanǵandaı, atalǵan zań jobasy aıasynda Qazaqstanda qarjy naryǵyn retteıtin jańa agenttik qurylmaq.
