Lombardtaǵy qaryz ıpoteka alýǵa kedergi keltire me
ASTANA. KAZINFORM — Lombardtan resimdelgen qaryz kredıt nemese ıpoteka alýǵa kedergi bolmaıdy, alaıda ol qarjy uıymynyń sheshimine áser etýi múmkin, dep habarlaıdy Qarjy naryǵyn retteý jáne damytý agenttiginiń baspasóz qyzmeti.
Ótinimdi qaraý kezinde bankter men mıkroqarjy uıymdary qaryz alýshynyń qarjylyq jaǵdaıyn jáne onyń qaryzdaryn óteý qabiletin baǵalaıdy. Kredıttik tarıh men borysh júktemesiniń deńgeıi mańyzdy ról atqarady.
— Eger qaryz alýshynyń lombard aldynda merzimi ótken bereshegi bolsa, bul maquldaý múmkindigin azaıtady. Mundaı mindettemeler borysh júktemesin esepteý kezinde basqa kredıttermen jáne mıkrokredıttermen teń eskeriledi. Lombardtar qaryzdar týraly aqparatty kredıttik bıýrolarǵa berýge mindetti, sebebi mundaı qaryzdar basqa qaryzdarǵa uqsas, aqylylyq, merzimdilik jáne qaıtarymdylyq sharttarynda beriledi. Eger qaryz alýshy mıkrokredıtti ýaqytynda ótemese, lombard kepilge qoıylǵan múlikti keminde 30 kún saqtaýǵa mindetti. Osy kezeńde qaryz alýshy qaryzdy tólep, óz zatyn qaıtara alady, — deıdi agenttik mamandary.
Osy merzim ótkennen keıin lombard kepildi satýǵa ne ony óz menshigine resimdeýge quqyly. Nátıjesinde lombardtaǵy zattardy kepilge qoıý týraly shart jáne mıkrokredıt berý týraly shart óz qoldanysyn toqtatady.
Qaryzdyń toqtatylý faktisin kepildi satý aktisi nemese ony lombardtyń menshigine aınaldyrý týraly sheshim jáne qaryzdy óteý týraly anyqtama sııaqty qujattar rastaıdy.
Kredıt berý týraly sheshimdi bank nemese mıkroqarjy uıymy zańnamalyq talaptardy eskere otyryp, sondaı-aq óziniń ishki kredıttik saıasatyna, qaryz alýshynyń tólem qabilettiligin baǵalaýǵa jáne qabyldanatyn táýekelder deńgeıine sáıkes derbes qabyldaıtynyn nazarǵa alý qajet.
Buǵan deıin lombardtar aldyndaǵy qaryz endi sottan tys bankrottyqqa kedergi bolmaıtynyn jazǵan edik.