Lokomotıv qurastyrý zaýytynda shyǵarylǵan otandyq TE33A-0072 teplovozyna Eltańba japsyrý rásimi ótti

ANA. 14 shilde. QazAqparat /Qanat Mámetqazyuly/ - Búgin Astanadaǵy Lokomotıv qurastyrý zaýytynda Údemeli ındýstrııalyq-ınnovatsııalyq damý baǵdarlamasy aıasyndaǵy temir jol salasynyń «Evolution» otandyq teplovozynyń besinshi býynyna Eltańba japsyrýdyń saltanatty rásimi júzege asty.

Osyǵan oraı, atalǵan zaýytta jýrnalısterge arnalǵan brıfıng bolyp ótti.

«Lokomotıv qurastyrý zaýyty» AQ fırmalyq logotıpin jazý jáne Qazaqstan Respýblıkasynyń Eltańbasyn bekitý - temir joldyń jyljymaly quramyn daıyndaýdaǵy kúrdeli jumystardyń qorytyndysy bolyp tabylady. Soǵan oraı «Evolution» serııasyndaǵy zaýyttyń 72-shi ónimi (TE33A-0072 teplovozy) zaýyt logotıpimen jáne Eltańbamen mórlendi. Eltańbany bekitýdiń saltanatty rásimin zaýyttyń slesary Nurlan Áshimov júzege asyrdy. Zaýyt basshysy «Lokomotıv qurastyrý zaýyty» AQ prezıdenti Marat Tileýbaevtyń aıtýynsha, byltyrǵy 2010 jyly zaýyt qabyrǵasynda osyndaı 30 teplovoz qurastyrylǵan. «Bıylǵy jyly onyń 79-yn shyǵarý kózdelip otyr. Búgingi Eltańba bekkitilgen teplovoz bizdiń bıylǵy jylǵy shyǵarǵan 42-shi ónimimiz bolyp tabylady», - dedi M. Tileýbaev.

Onyń aıtýynsha, teplovozdy qurastyrý eki fazadan turady. Búgingi kúni zaýyt onyń birinshi fazasyn ıgergen. Al kelesi jyldyń qańtarynan bastap ekinshi fazadaǵy toplovozdar shyǵaryla bastaıdy.

Esterińizge sala keteıik «Lokomotıv qurastyrý zaýyty» AQ «Qazaqstan temir joly» ulttyq kompanııasynyń enshiles kásiporny bolyp tabylady. Zaýyt 2009 jylǵy shildeniń 3-inde Memleket Basshysy N. Nazarbaevtyń qatysýymen ashylǵan bolatyn. Sol jyly jeltoqsan aıynda elimizde shyǵarylǵan alǵashqy teplovoz paıdalanýǵa berilgen edi.