«Lokomotıv» AQ basshysy Qostanaıda poıyz mashınısterin jalǵan qujattarmen jumysqa qabyldaý máselesine túsinik berdi
ASTANA. 22 qarasha. QazAqparat /Gúlmıra Álıakparova/ - Qostanaı oblysynda poıyz mashınısteri jumysqa jalǵan qujattarmen qabyldanǵandyǵy týraly quqyq qorǵaý organdary taratqan aqparat shyndyqqa janaspaıdy. Bul týraly QazAqparat tilshilerine bergen suhbatynda «Qazaqstan temir joly» UK» AQ-nyń enshiles kompanııasy «Lokomotıv» AQ prezıdenti Qadyl Talaspekov málim etti.
Eske salaıyq, buǵan deıin birqatar buqaralyq aqparat quraldarynda jarııalanǵandaı, Qostanaı stansysyndaǵy Jelilik ishki ister bólimi (JІІB) «Lokomotıv» AQ fılıaly «Qostanaı lokomotıvter paıdalaný deposynda» tekserister júrgizip, teplovoz mashınısteriniń bilimderin rastaıtyn qujattar jalǵan ekendigin anyqtaǵan.
Q.Talaspekovtyń aıtýynsha, quqyq qorǵaý organdary taratqan bul aqparattyń negizi joq. «Birinshiden», - deıdi ol, JІІB qyzmetkerleri mashınısterdiń emes, olardyń kómekshileriniń qujattarynan kinarat tapqan. Ekinshiden, mashınıst kómekshileri jumysqa kásibı tehnıkalyq mektepterdiń bergen kýálikterimen alynǵan. Másele, ol qujattardy bergen bilim mekemelerinde bolyp tur.
«Bul jerde, quqyq qorǵaý organdary nazarlaryn kásibı tehnıkalyq mektepterge aýdaryp, qujattardy bergen tulǵalardy anyqtaýy tıis. Óz kezegimizde, atalmysh bilim berý mekemeleriniń oqytý kýrstarynan ótpegenderge kýálikterdi ońdy-soldy taratýyn anyqtaý úshin quqyq qorǵaý organdaryna hat joldaǵan bolatynbyz. Biraq bizdiń ótinishimiz jaýapsyz qaldy. Degenmen, mundaı ahýal aldaǵy ýaqytta qaıtalanbas úshin barlyq paıdalaný depolaryna mashınıster men olardyń kómekshilerin jumysqa qabyldar aldynda, olardyń bilimi týraly qujattaryn rastaý úshin oqytý mekemelerine joldama jiberý tapsyrmasyn berdik», - dep atap ótti.
Kompanııa basshysynyń sózine qaraǵanda, mashınıst kómekshileri teplovozdardy basqarý isine aralastyrylmaıdy. Al mashınısterdiń kásibıligine qatań talaptar qoıylady. Olar aldymen belgili ýaqyt tájirıbeli mamandardyń janynda biliktilikterin arttyrady. Keıin, kompanııanyń joldamasy boıynsha «QTJ» UK» AQ-nyń fılıaldarynda (Qaraǵandy, Pavlodar, Aqtóbe, Tarazda) oqýdan ótedi.
