Lokdaýn saldarynan benzınge degen suranys tómendegen
NUR-SULTAN. QazAqparat – 2020 jylǵy qańtar-qarasha aılarynda elimizde 4,1 mln tonna benzın óndirildi. Bul ótken jylǵy kórsetkishpen salystyrǵanda 0,3%-ǵa artyq, dep habarlaıdy QazAqparat energyprom.kz saıtyna silteme jasap.
Shymkentte 1,8 mln tonna benzın (1 jylda 2,9%-ǵa artqan), Palodar oblysynda 1,3 mln tonna benzın (1 jylda 6,6%-ǵa artqan), Atyraý oblysynda 963 myń tonna benzın (1 jylda 12,2%-ǵa azaıǵan).
Eske sala keteıik, atalǵan óńirlerde «PetroKazahstan Oıl Prodakts» JShS, Pavlodar munaı-hımııa jáne Atyraý munaı óńdeý zaýyttary jumys isteıdi.
On aıdyń qorytyndysy boıynsha eldiń ishki naryǵynda benzındi satý 11,5%-ǵa qysqardy (al avıaotyndy tutyný bir jylda birden 30%-ǵa tómendedi). Oǵan karantın shekteýleri sebep bolyp otyr. Bul rette otandyq kompanııalar ishki jáne syrtqy sektorlarda suranysty tolyǵymen qamtamasyz etti. Import úlesi 0,03%-dy qurady, kólemi bir jyl ishinde birden 15,4 ese tómendedi.
Sonymen qatar, eksport úlesine resýrstardyń 12,1% tıesili, al bir jyl buryn bul kórsetkish tek 0,6%-dy quraǵan bolatyn. Qazaqstan 445,6 myń tonna benzındi eksporttady, bul bir jyl burynǵy kórsetkishke qaraǵanda 20 ese kóp.
Sonymen qatar, sarapshylar motor otynynyń jetispeý qaýpi bar dep sanaıdy. Qazaqstanǵa jyl saıyn qaıta óńdeý jáne óziniń tutynýy úshin shamamen 17 mln tonna shıki munaı qajet.
Іshki tutyný úshin jyl saıyn shamamen 5-6 mıllıon tonna munaı jetispeıtin. Tapshylyq reseılik jetkizilim esebinen óteldi, deıdi sarapshylar. 2020 jyly karantınge jáne JJM-ǵa suranystyń jalpy tómendeýine baılanysty tapshylyq týyndaǵan joq.
Budan basqa, Qazaqstannyń Munaı servıstik kompanııalar odaǵy prezıdýmynyń tóraǵasy Rashıd Jaqsylyqov Qazaqstannyń Eýrazııalyq ekonomıkalyq odaq sheńberindegi mindettemelerine baılanysty aldaǵy jyldary otyn baǵasy ósetinin habarlady. Biraq ázirge Qazaqstanda ishki tarıf áli de óz kúshinde.
AI-92 bir jylda 2,7% -ǵa qymbattap, lıtrine 150,7 teńgeni qurady. AI-95/96 - 0,8% -ǵa artyp, 1 lıtri 171,3 teńge bolsa, AI-98 - 1,4% -ǵa ósip, 190,2 teńgeni qurady.
