Lokdaýn: Portýgalııa azamattarynyń elden shyǵýyna tyıym saldy

LISSABON. QazAqparat – Portýgalııa úkimeti jańa koronavırýstyń taralýyn boldyrmaý úshin Ispanııamen shekarany jabý týraly sheshim qabyldady, dep habarlaıdy QazAqparat Euronews-ke silteme jasap.

Jergilikti BAQ-tyń habarlaýynsha, buıryq juma kúni kúshine enedi jáne eki apta boıy qoldanysta bolady. Sondaı-aq 14 kún ishinde bılik azamattardyń elden áýe jáne jer ústi kóligimen shyǵýyna shekteý qoıady. Buǵan deıin respýblıka Parlamenti tótenshe jaǵdaı rejımin 14 aqpanǵa deıin uzartqan bolatyn.

Epıdemııamen kúresý sharalary adamdardyń júrisin shekteıdi. Sonymen birge zeınetkerlikke shyqqan dárigerlerdi aýrýhanaǵa qaıta jumys isteýge jumyldyrýǵa múmkindik beredi. Bılik sońǵy ýaqytta elde ınfektsııanyń taralý qarqyny artyp kele jatqanyna qatty alańdaýly.

Sońǵy táýlikte elde COVID-19 saldarynan 303 naýqas qaıtys boldy. Bul Portýgalııadaǵy epıdemııa bastalǵannan bergi eń joǵary kórsetkish. 24 saǵat ishinde 16 432 adamda koronavırýs anyqtaldy.

COVID-19 ólimi men ınfektsııa juqtyrý sany Lıssabon men Vale-dý-Tejgý aımaǵynda eń kóp tirkelgen. Densaýlyq saqtaý mınıstri Marta Temıdanyń aıtýynsha, munda pnevmonııanyń shamamen 50%-yn brıtanııalyq koronavırýs shtamy qozdyrǵan.