Logıstıkanyń tıimdiligi: Qazaqstan «88»-den «77»-ge jyljydy
ASTANA. QazAqparat - Qazaqstan logıstıkanyń tıimdiligi jaǵynan TMD elderin artqa tastap, halyqaralyq reıtıngte 88-shi orynnan 77-ge kóterildi, dep habarlaıdy QazAqparat tilshisi.
QR Investıtsııalar jáne damý mınıstri Jeńis Qasymbektiń aıtýynsha, búginde «Qytaı-Eýropa-Qytaı» baǵytyndaǵy tranzıttik konteınerler tasymaly 2 esege artyp, 104,5 myń konteınerdi qurap otyr. 2015 jylda atalǵan kórsetkish 47,3 myń konteıner bolǵan. Aǵymdaǵy jylda barlyq konteınerler tasymalynyń kólemi 330 myń konteınerge deıin jetedi degen boljam bar. Sonyń ishinde «Qytaı-Eýropa-Qytaı» konteınerlik tasymaly 230 myńǵa jetýi tıis.
«Tranzıttik avıajolaýshylar sany 2016 jyly 250 myńnan 478 myńǵa deıin jetti. 2017 jyly olardyń sany 600 myńǵa jetedi dep josparlanýda. Negizgi jolaýshylar legin Azııadan Qazaqstan arqyly Eýropaǵa jáne keri baǵytta qatynaıtyndar quraıdy», - dedi Qasymbek mınıstrliktiń búgingi keńeıtilgen alqa májilisinde.
Qazaqstandyq áýe kompanııalardyń Eýropalyq Odaq elderine ushýyna qoıylǵan shekteý alyndy. Endi EKSPO-2017 kezinde týrısterge qyzmet kórsetý úshin Astana qalasyna ushatyn áýe reısteriniń sanyn arttyrý maqsatynda «ashyq aspan» jobasyn bastaý kózdelip otyr.
«Nurly jol» baǵdarlamasy boıynsha respýblıkalyq mańyzy bar 913 shaqyrym avtokólik joldaryndaǵy jóndeý jumystary aıaqtaldy, sondaı-aq, onyń 767 shaqyrymy paıdalanýǵa berildi. Jobany júzege asyrý úshin 75 myń adam jumyldyryldy», - deıdi mınıstr.
2017 jyly bólingen qarjy esebinen 7 ótpeli jobalardyń jumysy jalǵasyp, (Astana-Qaraǵandy, Ortalyq-Shyǵys, Beıneý-Aqtaý, Ortalyq-Batys, Qapshaǵaı-Taldyqorǵan, Astana-Petropavl jáne Oral-Kamenka), jyl sońynda sonyń 602 shaqyrymyndaǵy jumystar aıaqtalady dep josparlanyp otyr. Sondaı-aq, jalpy uzyndyǵy 3,2 myń shaqyrymdy quraıtyn 12 jańa jobanyń qurylysy bastalady. Onyń ishinde jalpy uzyndyǵy 2,5 myń shaqyrymdy quraıtyn 9 joba Halyqaralyq qarjy ınstıtýtynyń (MFI) esebinen júzege asyrylatyn bolady.
Mınıstrdiń aıtýynsha, bıyl jalpy uzyndyǵy 4,4 myń shaqyrym jolda jumys júrgiziledi. Oǵan 100 myń adam tartylady. Budan bólek, 469 shaqyrymdy quraıtyn Almaty-Temirtaý, Almaty-Qapshaǵaı jáne Almaty-Qorǵas avtojoldarynda aqyly júıe engiziledi.
Sonymen qatar, mınıstr avtojoldarmen qatynaýshylarǵa qyzmet kórsetý deńgeıin arttyrý úshin sapaly ınfraqurylymǵa úlken mán beriletinin atap ótti. Aǵymdaǵy jyly joldardyń boıynda halyqaralyq talaptarǵa saı 50 qyzmet kórsetý nysanyn salyp, qazir jumys istep turǵan 800 nysandy jańǵyrtý josparlanyp otyr.
