Іlim-bilim, parasattyń bári kitapta – aqyn Aqushtap Baqtygereeva
ORAL. KAZINFORM – Oral qalasynda Ulttyq kitap kúnine oraı «Ulttyq mura jáne kitap álemi: dáýirler sabaqtastyǵy» atty kitap festıvali ótkizildi.
Juban Moldaǵalıev atyndaǵy Batys Qazaqstan oblystyq ámbebap ǵylymı kitaphanasy uıymdastyrǵan is-sharada jańa ádebıetter kórmesi, kitap baspalary men dúkenderiniń jármeńkesi, Abaı, Juban, Qadyr beıneleri somdalǵan kórinister kelýshiler nazaryna usynyldy.
Almatydan arnaıy kelgen qazaqtyń kórnekti aqyny, Memlekettik syılyqtyń ıegeri Aqushtap Baqtygereeva Memleket basshysynyń bastamasymen alǵash ret elimizde qolǵa alynǵan Ulttyq kitap kúniniń mán-mańyzyna toqtaldy.
– Kitap merekesi respýblıka boıynsha barlyq jerde ótip jatyr. Biz otyz jyl kitaptan adasyp qaldyq. Baılyq qýý abyroı ápermeıdi. Bárin aqshaǵa tiregen zaman buryn da ótken. Kitap oqymaǵannyń kesirinen bolyp jatqan kemshilikter túzeledi. Sana, tárbıe, ilim-bilim, parasattyń bári kitapta. Sondyqtan aınalaıyn jastar, kitap oqyńdar. Keler urpaqtyń álem bilimpazdarymen ıyq teńestirip, jańalyq ashatynyna senemin, - dedi A.Baqtygereeva.
BQO ákiminiń orynbasary Qaıyrjan Meńdiǵalıevtiń sózine qaraǵanda, óńirde 356 kitaphana zaman talabyna saı jumys istep tur. 25 kitaphana qaıta jańǵyrtylyp jatyr. Oblysta kitap oqımyn degen adamǵa barlyq jaǵdaı jasalǵan.
QR Prezıdenti janyndaǵy Ulttyq quryltaı múshesi, Qazaqstan Jazýshylar odaǵynyń Batys Qazaqstan oblysyndaǵy ókili, jazýshy Baýyrjan Ǵubaıdýllın óńir qalamgerleri atynan lebizin jetkizdi.
– Parasatty qoǵamdy halyq qalyptastyrady. Parasatty halyqty kórkem ádebıet qalyptastyrady. Osydan-aq adamzat úshin de, jeke adam úshin de kórkem ádebıettiń mán-mańyzy aıryqsha zor ekenin ańǵarýǵa bolady. Sondyqtan ózimiz otbasynda bala-shaǵymyzdyń kózinshe kitapqa qaıtadan oralyp, ýaqytymyzdy bóleıik. Bizdiń úlgi-ónegemizdi kórgen jas urpaq ta kitap oqıtyn tolqyn bolyp qalyptasady, - dedi B.Ǵubaıdýllın.
Sondaı-aq Baýyrjan Ǵubaıdýllın qalyń buqara zııaly qaýymǵa qarap oıyn da, boıyn da túzeıtinin aıtty.
Eske sala keteıik, budan buryn Qazaqstanda Ulttyq kitap kúni toılanatynyn jazǵan edik.