Іlııas Sarıevtiń soty: kúdikti naýqas balalardyń otbasynan mıllıondar alǵan
ALMATY. KAZINFORM – Almatyda ózin «Qazaqtyń Robın Gýdy» dep ataıtyn «Elge kómek» qaıyrymdylyq qorynyń basshysy Іlııas Sárıevke jáne Aqtoty Dúıseevaǵa qatysty kezekti sot protsesi ótti.
Búgin sotta úsh jábirlenýshige sóz berildi. Olardyń biri Aıman Kenjetaıqyzy boldy.
– 2025 jylǵy 4 naýryzda men WhatsApp arqyly Sarıevke 3 jasar qyzym úshin qarajat jınaýǵa kómek surap habarlastym. Ol dereý qońyraý shalyp, balany kórgisi keletinin aıtty da, birneshe saǵattan keıin úıge keldi. Jaǵdaıdy surap bildi, men qajetti somany atadym. Ol qarajat jınaýdy ashatynyn aıtty. Sodan keıin «mobılograftyń qyzmetine tóleý úshin» 100 myń teńge surady, biraq jınaýdy tek 8 naýryzdan keıin bastaıtynyn jetkizdi. Biz kelistik. Keıin men oǵan bólip-bólip 750 myń teńge aýdardym. Bul – qyzymnyń emine adamdar jınaǵan aqsha edi. 8 naýryzdan keıin onymen baılanysý qıynǵa soqty. Sońǵy ret 29 naýryzda sóılestik, – dedi ol.
Aıman Kenjetaıqyzynyń aıtýynsha, ol aqshany Sarıevtiń áıeli Shynardyń, «inisi» dep tanystyrǵan Nartaıdyń jáne taǵy bir beıtanys adamnyń esepshotyna jibergen.
– Sarıev menen taǵy 120 myń teńge surady, ony «úıine jóndeý jasaǵan qurylysshyǵa» dep aıtty. Biraq keıin ol adamnyń qurylysshy emestigi jáne Sarıevtiń ony da 1,5 mln teńgege aldaǵany anyqtaldy. Sóıtip, meniń aqsham onyń qaryzyn jabýǵa ketken bolyp shyqty. Al Sarıevtiń áıeli bul qarajatty ekinshi aıyptalýshy – Aqtoty Dúıseevaǵa aýdarǵanyn aıtty, – dedi jábirlenýshi.
Sotta ekinshi sóılegen jábirlenýshi Venera Sultanqyzy da uqsas jaǵdaı basynan ótkenin baıandady.
– Áleýmettik jeliden Sarıevtiń adamdarǵa kómektesip júrgenin kórdim. Qyzym Gúzál aýyr dertke shaldyqqan, sondyqtan Shelek aýylynda qarajat jınaýdy ashtym. 6 qańtarda ózim onymen habarlastym. Ol «mobılograftyń jumysyn tóleseń, bir aıda qajetti somany jınap beremin» dedi. 10 aqpanda 500 myń teńgeni Dıas esimdi adamǵa aýdardym. Keıin «tisim aýyryp tur», «basqa sharýalarym bar» dep túrli syltaý aıtty. Sodan keıin Almatyǵa shaqyrdy. Ol jerge mobılograf Dıaspen birge keldi. Biraq «vıdeo shyqpaı qaldy, aýylǵa qaıta barý kerek» dep jolǵa taǵy 50 myń surady, – dedi ol.
Onyń aıtýynsha, Shelek aýylynda vıdeo túsirilgen soń, Sarıev áıelderge gúl taratyp, jábirlenýshige senim uıalatqan.
– Barlyǵy 1 mln 430 myń teńge aýdardym. Ol aýyldaǵy aqsha jınaýdy toqtatty. Biraq jańadan aqsha jınalmady, vıdeo da qolyma tımedi. Keıin Dıas Sarıev aqsha bermegendikten, vıdeony qaıtarmaımyn dedi. Sonda ǵana men aldanǵanymdy túsindim. Keıin aqshany taǵy da Raýan jáne Nartaı degen adamdarǵa aýdarǵanymdy bildim, – dedi ol.
Onyń sózinshe, eshqandaı resmı kelisimshart bolmaǵan, tek aýyzsha jáne messendjer arqyly sóılesken.
Taǵy bir jábirlenýshi Ámirova áleýmettik jeliden «MM Travel» týrıstik kompanııasynyń bir kúndik aktsııasyn kórgenin aıtty. Onda Ýmraǵa 500 myń teńgege joldama usynylǵan.
– 21 aqpanda aıyptalýshy Aqtoty Dúıseevaǵa 100 myń teńge aýdardym, ertesinde – 150 myń, al 1 naýryzda onyń menedjerine taǵy 300 myń berdim. 6 naýryzda Almatyǵa keldik, biraq keńse jabyq bolyp shyqty. «Reıs keıinge qaldyryldy» dedi. Eki ret keıinge qaldyrǵannan soń, múldem habarsyz ketti, – dedi ol.
Sot protsesi 25 qyrkúıekte jalǵasady.
Eske salaıyq, sáýir aıynda «Elge kómek» qaıyrymdylyq qorynyń basshysy Іlııas Sarıev alaıaqtyq jasady degen kúdikke ilinip, ustaldy.
Keıin Almaty sotynda «Elge kómek» qoryna qatysty is qarala bastady. Sotta memlekettik aıyptaýshy qylmystyq is boıynsha aıyptaý aktisin oqydy.
Іlııas Sárıev sotta kinásin ishinara moıyndady.