Lıvııany munaı-gaz úshin bombylaýda - V.Pýtın
ASTANA. 27 sáýir. QazAqparat - RF Premer-Mınıstri Vladımır Pýtın Lıvııanyń Batysqa ne úshin kerek bolǵanyna túsindirme berdi.
Reseı úkimeti basshysynyń pikirinshe, halyqaralyq koalıtsııany is júzinde demokratııa tolǵandyryp otyrǵan joq, olarǵa Lıvııanyń tabıǵı baılyǵy tynyshtyq bermeýde, dep habarlaıdy Utro.ru saıty.
«Bile bilseńizder, Lıvııa Afrıkada munaı qory boıynsha - birinshi, gaz qory boıynsha tórtinshi orynda. Lıvııaǵa shabýyl jasap jatqandardyń «kóz qurty» bolyp otyrǵan - osy baılyq emes pe degen zańdy saýal týyndaıdy», - dep málim etti Pýtın Kopengagende danııalyq áriptesi Lars Lekke Rasmýssenmen bolǵan kelissózdiń qorytyndysy boıynsha ótken baspasóz máslıhatynda.
Reseı premeriniń aıýynsha, koalıtsııa músheleri BUU qararynyń sheginen shyǵyp ketip, Mýammar Kaddafıdiń basyn jutqaly otyr. «Áýelde áýe keńistigin ǵana jabamyz dep bastaǵan olar, endi tún saıyn Kaddafı saraıyna tópep shabýyl jasaýda... Kaddafıdiń óltirý - oıymyzda joq, degen edi. Endi kelip, keıbir resmı tulǵalar «maqsatymyz - Kaddafıdiń kózin joıý» dep málim etip otyr. Olarǵa kim ruqsat berdi. Álde sot boldy ma? Olarǵa, meıli ol qandaı adam bolmasyn, ony sotsyz ólim jazasyna kesýge kim quqyq berdi?», - dedi Pýtın.
Premer sondaı-aq Lıvııany shabýyldaý barysynda beıbit halyqtyń opat bolyp jatqanyn atap kórsetti. «Kaddafı joq, ol áldeqashan bir bombapanada boı tasalap otyr, al beıbit halyq qyrylyp jatyr», - dedi ol. Osylaısha, batys elderi rejımmen kúresýdiń ornyna Lıvııanyń ınfraqurylymyn jermen-jeksen etýde.
«Biz beıbit halyq úshin jaýapkershilikti, qamqorlyqty sezine otyryp, halyqaralyq quqyq aıasynda áreket etýimiz kerek. Ózderin órkenıetti sanaıtyn qoǵamdastyqtyń shaǵyn ǵana elge bar pármenimen shúıligip, ǵasyrlar boıy turǵyzylǵan ınfraqurylymdy joıýy - jaqsy ma, jaman ba? Maǵan bul jaǵdaı unamaıdy», dep atap kórsetti RF premeri.
RF Syrtqy ister mınıstri Sergeı Lavrov búgin málimdeme jasap, eger BUU azamattyq soǵys pen zorlyq-zombylyqty ári qaraı órshitýdi arandata berse, Máskeýdiń BUU-nyń Lıvııa boıynsha jańa qararyn qoldamaıtynyn aıtty. Frantsııa men Ulybrıtanııa da buǵan deıin rejımniń aýysýy týraly eshteńe aıtylmaǵan atalmysh qujatty synaǵan edi.
