Lıvııanyń batysyndaǵy ónerkásiptik aımaqta qýatty jarylys boldy
ASTANA. KAZINFORM — Jeksenbi kúni Lıvııa astanasy Trıpolıden shamamen 200 km shyǵysta ornalasqan Mısýrata qalasynyń óndiristik aımaǵyna jaqyn Skırat aýdanynda qýatty jarylys boldy, dep habarlaıdy Sınhýa.
Bul týraly Lıvııanyń «Al-Masar» telearnasy habarlady. Alaıda jarylystyń naqty sebebi týraly resmı aqparat áli jarııalanǵan joq.
Mısýrata medıtsınalyq ortalyǵynyń resmı ókili Muhammed Ál-Nıhým Lıvııanyń «Al-Ahrar» telearnasyna bergen málimdemesinde, jarylys saldarynan jeńil jáne ortasha deńgeıde jaraqat alǵan alty adamnyń aýrýhanaǵa jetkizilgenin aıtty.
Jarylystyń saldarynan janǵysh snarıadtar men jaryqshaqtar jaqyn mańdaǵy turǵyn aýdandarǵa shashyrap túsken. Osyǵan baılanysty bılik atalǵan aımaqtardaǵy turǵyndardy evakýatsııalaýǵa sheshim qabyldady. Oqıǵa ornyna jedel járdem kólikteri men azamattyq qorǵanys brıgadalary kelgen. Qaýipsizdik kúshteri oqıǵa ornyna baratyn joldardy jaýyp tastady.
Budan buryn Lıvııada mıgranttar mingen keme apatqa ushyrap, 18 adam qaza tapqanyn jazǵan edik.